الماتى اۋەجايىنا بۇرىن بورتىندا قىتايدا تارالىپ جاتقان كورنوۆيرۋس جۇقتىرعان جولاۋشى وتىرعان ۇشاق قونىپ، جانارماي تولتىرعان. بۇل تۋرالى الماتى قالاسى اكىمدىگىنىڭ باسپا ءسوز قىزمەتى حابارلادى. 

اكىمدىكتىڭ حابارلاۋىنشا، جانارماي تولتىرۋ كەزىندە ەكيپاج مۇشەلەرى مەن جولاۋشىلار ۇشاق ىشىنەن ەۆاكۋاسيالانباعان. 

"25 قاڭتاردا الماتى قالاسىنىڭ اۋەجايىندا "ستانبۋل – ۋحان – ستانبۋل" باعىتى بويىنشا ۇشىپ بارا جاتقان TCCJ چارتەرلىك رەيسى جانارماي تولتىرۋ ءۇشىن ايالدادى. قولدا بار اقپارات بويىنشا، بۇرىن وسى بورتتا كوروناۆيرۋس جۇقتىرعان جولاۋشى بولعان. الماتى اكىمدىگى اۋە كەمەسىنە قوسىمشا كەروسين قۇيۋ كەزىندە بارلىق سانيتارلىق-كارانتيندىك باقىلاۋدىڭ كۇشەيتىلگەن نورمالارىن ساقتاپ، قاجەتتى شارالاردى قابىلدادى. ەلىمىزدەگى ءىرى مەگاپوليستىڭ اۋماعىندا كوروناۆيرۋستىڭ تارالۋىنا جول بەرمەۋ ماقساتىندا كەروسين قۇيۋ وپەراسياسى جولاۋشىلار مەن ەكيپاج مۇشەلەرىن ەۆاكۋاسيالاۋسىز جۇزەگە اسىرىلدى" دەلىنگەن اكىمدىك حابارلاماسىندا. 

الماتى اكىمدىگىنىڭ حابارلاۋىنشا، قالاعا قىتايدىڭ 5 قالاسىنان كەلەتىن رەيستەرى ەسكەرىلىپ، قالالىق تاۋارلار مەن قىزمەتتەردىڭ قاۋىپسىزدىگىن باقىلاۋ كوميتەتى دەپارتامەنتى جانە اۋەجايدىڭ مەديسينالىق قىزمەتى ەپيدەمياعا قارسى سانيتارلىق-پروفيلاكتيكالىق شارالاردى جۇزەگە اسىرىپ جاتىر. بۇعان قوسا، بارلىق جولداردا، سونىڭ ىشىندە تەمىرجول، اۆتوموبيل جولدارىندا، قىتايمەن شەكارالاس بارلىق سانيتارلىق-كارانتيندىك پۋنكتتەردە تەرمومەتريا جۇرگىزىلۋدە. الماتى اكىمدىگىنىڭ مالىمەتىنشە، قازىرگى ۋاقىتقا دەيىن 13 مىڭنان استام جولاۋشى تەكسەرىستەن وتكەن. ولاردىڭ ەشقايسىنان ينفەكسيانى جۇقتىرۋ وقيعاسى تىركەلمەگەن. 

قازاقستاننىڭ دەنساۋلىق ساقتاۋ مينيسترلىگى ەلدە قىتايدا تارالا باستاعان كوروناۆيرۋستىق ينفەكسيا تىركەلمەگەنىن رەسمي ايتتى. 

25 قاڭتاردا جۇڭگو ۆيرۋستان 41 ادام كوز جۇمدى، 29 پروۆينسيادا كەمىندە 1 287 ادام ۆيرۋستى جۇقتىرعان دەپ حابارلادى. 237 ناۋقاستىڭ جاعدايى اۋىر دەپ ايتىلادى. حۋبەي پروۆينسياسىندا – 39 ادام، حەبەي پروۆينسياسىندا – ءبىر ادام، حەيلۋنسزياندا - ءبىر ادام كوز جۇمعان.

قىتايدا تارالىپ جاتقان ۆيرۋس اقش، فرانسيا جانە اۆسترالياعا جەتكەن. ءبىراق قىتايدان تىس جەردە ۆيرۋستى جۇقتىرعاندار اراسىندا ادام ءولىمى بولعان جوق.

وتكەن جىلدىڭ اياعىندا قىتايدا بەلگىسىز ۆيرۋس تاراپ جاتقانى ايتىلا باستادى. كورونوۆيرۋس دەپ اتالعان بۇل ۆيرۋس قىتايدىڭ ۋحان جانە حۋانگەن قالالارىندا كوپتەپ تارالعان. سوعان بايلانىستى جۇڭگو بيلىگى بۇل ەكى قالانى جاپتى. ازىرگە پنيەۆمونياعا ۇقساس دەرتكە شالدىقتىراتىن ۆيرۋستىڭ قايدان شىعىپ جاتقانى بەلگىسىز. 

23 قاڭتاردا دۇنيەجۇزىلىك دەنساۋلىق ساقتاۋ ۇيىمى (ددسۇ) قىتايدا ينفەكسيانىڭ تارالۋىنا بايلانىستى دەنساۋلىق ساقتاۋ سالاسىندا توتەنشە جاعداي جاريالاۋدان باس تارتتى. ددسۇ-نىڭ باسشىسى تەدروس ادزحنوم گەبرەيەسۋستىڭ ايتۋىنشا، مۇنداي شەشىم قابىلداۋ ءۇشىن ءالى كوپ دەرەك جيناقتالۋى ءتيىس.