"Nur Otan" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك باستاۋىش پارتيا ۇيىمدارى وكىلدەرىمەن كەزدەسۋىندە پارتيانىڭ الداعى ۋاقىتتاعى جوسپارلارىمەن ءبولىستى.

ونىڭ ايتۋىنشا، ەلباسىنىڭ تاپسىرماسى بويىنشا "Nur Otan" پارتياسى ۇكىمەتپەن بىرىگىپ جەرگىلىكتى ەرەكشەلىك پەن حالىقتىڭ ناقتى قاجەتتىلىكتەرىن ەسەپكە الا وتىرىپ، ايماقتىق باعدارلامالاردى دايىنداۋ بويىنشا جۇيەلى جۇمىس جۇرگىزىپ جاتقان كورىنەدى. نۇروتاندىقتار بارلىق پروبلەماسى كوپ بەكەتتەردى، سونىڭ ىشىندە، شالعاي اۋداندار مەن اۋىلداردى قامتۋدى جوسپارلاپ وتىر.

"ءبىز ءار اۋدان ءۇشىن پارتيانىڭ جەكە باعدارلاماسىن ازىرلەگىمىز كەلەدى. جەرگىلىكتى جەردەگى ماسەلەلەر مەن سۇرانىستارعا باسىمدىق بەرسەك دەيمىز. ءبىز حالىقتىڭ كوڭىلى قالايتىن ناقتى ماسەلەلەردى شەشكىمىز كەلەدى. ەكىنشىدەن، ءبىز كانديداتتارىمىزدى پرايمەريز، ياعني، پارتيا ىشىندەگى ىرىكتەۋ ارقىلى ۇسىنعىمىز كەلەدى. مۇنىڭ بارلىعى اشىق دەبات تۇرىندە وتكىزىلەتىن بولادى. ءتيىمدى ءماسليحات قالىپتاستىرعىمىز كەلەدى. سوندىقتان Nur Otan پارتياسىنىڭ مىندەتى كرەاتيۆتى ويلايتىن، اشىق-جارقىن جانداردى ۇسىنۋ بولىپ تابىلادى. سونداي-اق، ءبىزدىڭ قىز-كەلىنشەكتەر مەن جاستاردى بەلسەندى قولداپ، كوتەرمەلەيتىن بولامىز. بۇل ەلباسى نۇرسۇلتان نازاربايەۆ پەن ەل پرەزيدەنتى قاسىم-جومارت توقايەۆتىڭ تىكەلەي تاپسىرماسى. ايەلدەردىڭ 30%-ى مەن جاستاردىڭ 20%-ى ءماسليحاتتاردىڭ بارلىق دەڭگەيىندە بولۋى ءتيىس"،- دەپ اتاپ ءوتتى باۋىرجان بايبەك.

پارتيالىقتارعا ارناپ ۇيىمداستىرىلعان وقىتۋ ترەنينگتەرىنە قاتىسا وتىرىپ، Nur Otan پارتياسى ءتوراعاسىنىڭ ءبىرىنشى ورىنباسارى سونداي-اق، دارىگەرلەر ولاردىڭ تۋىستارى مەن جاقىندارىن قۇتقارىپ قالعان وقيعالارمەن الەۋمەتتىك جەلىلەردە بولىسە وتىرىپ، اق حالاتتى ابزال جانداردى قولداۋعا شاقىردى.

"ءبىز دارىگەرلەردى قولداۋىمىز قاجەت. اركىم دارىگەرلەردىڭ ولاردىڭ تۋىستارى مەن جاقىندارىن قالاي قۇتقارىپ قالعانى تۋرالى اڭگىمەلەسىن. بۇل وتە كۇردەلى مورالدىق قولداۋ بولىپ تابىلادى. جەكە ماماندارعا، باسشىلارعا قاتىستى ماسەلەلەردىڭ بولاتىنى دا ءسوزسىز. ءبىراق جاعدايدىڭ 99%-ىندا دارىگەرلەر ادامدارعا كومەكتەسىپ، ولاردىڭ ءومىرىن قۇتقارىپ وتىر، الايدا كەيبىرەۋلەر سەكىلدى وزدەرىن جارنامالامايدى. ۇندەمەي عانا جۇمىس ىستەيدى. سونىمەن قاتار، مۇعالىمدەردى، مەملەكەتتىك قىزمەتكەرلەردى، پوليسيا قىزمەتكەرلەرىن دە قولداۋىمىز كەرەك دەپ ەسەپتەيمىن. تاڭەرتەڭنەن كەشكە دەيىن جۇمىس ىستەپ، كەيدە ءتىپتى وتباسىلارىنا كوڭىل بولۋگە ۋاقىتتارى بولمايدى. بىردە مەملەكەتتىك قىزمەتكە وپپوزيسيادان ادام شاقىرعانى ەسىمدە. ءبىراق ول اپتا دا شىداي المادى"،- دەپ اعىنان جارىلدى باۋىرجان بايبەك.

ايتا كەتەتىن جايت، پارتيالىق "قايتا جاڭعىرۋ" اياسىندا ساياسي مەنەدجمەنت مەكتەبى 10 مىڭنان استام نۇروتاندىقتارعا ارناپ وقىتۋ سەمينارىن باستادى. ايماقتىق فيليالداردىڭ، باستاۋىش پارتيا ۇيىمدارىنىڭ وكىلدەرى مەن پيلوتتىق پارتيا ىشىندەگى كادرلىق ىرىكتەۋ جەڭىمپازدارى تۇلعالىق قۇزىرەتتى دامىتۋ، حالىقپەن جانە ازاماتتىق قوعام ينستيتۋتتارىمەن ءتيىمدى ءوزارا ارەكەت ەتۋ، داعدارىستىق بايلانىس جانە ت.ب. سالادا ماشىقتانۋ دەڭگەيىن ارتتىرۋ بويىنشا ترەنينگتەرگە قاتىسۋدا.