قازاقستاننىڭ ۇلتتىق بانكى نومينالدىق قۇنى 200 تەڭگەلىك  مونەتالاردى اينالىمعا شىعارىلعانىن حابارلادى.

مونەتالاردىڭ ديزاينى قازاقستان 2018 جىلعى 12 جەلتوقسانداعى № 804 جارلىعىمەن بەكىتىلگەن ۇلتتىق ۆاليۋتا – قازاقستان تەڭگەسى بانكنوتتارى مەن مونەتالارى ديزاينىنىڭ تۇجىرىمداماسىنا سايكەس جاسالدى.

مونەتالاردىڭ سىرتقى ساقيناسى نەيزيلبەردەن جاسالعان، ىشكى ديسكى نيكەلدى جەزدەن دايىندالعان. قىرى تەگىس جانە بەدەرلى سەكتورلارمەن كەزەكتەسىپ وتىراتىن 16 ويىقپەن بەدەرلەنگەن. مونەتالاردىڭ سىرت جاعىنداعى ورتالىق بولىگىندە قازاقستانىڭ مەملەكەتتىك ەلتاڭباسى، ال اينالدىرا ەميتەنت ەلدى بىلدىرەتىن "QAZAQSTAN RESPÝBLIKASY" دەگەن جازبا بەينەلەنگەن. سونداي-اق، مونەتانىڭ تومەنگى جاعىندا جاسالعان جىلىن بىلدىرەتىن "2020" دەگەن جازۋ بار.

مونەتالاردىڭ بەت جاعىندا ورتالىق بولىگىندە نومينالىن بىلدىرەتىن جانە نومينال سيفرىنىڭ كەسكىنىن قايتالايتىن كولدەنەڭ سىزىقتار بەدەرى اياسىندا ورىندالعان "200"دەگەن جازۋ بار.

مونەتانىڭ جوعارعى جانە تومەنگى بولىكتەرىندە – تىك سىزىقتار تۇرىندە ورىندالعان ويۋ-ورنەك كەسكىندەرى بار. مونەتانىڭ تومەنگى بولىگىندە – ۇلتتىق ۆاليۋتانىڭ ماتىندىك اتاۋىن بىلدىرەتىن "TEŃGE" دەگەن جازۋ. مونەتانىڭ سول جاق بولىگىندە QAZAQSTAN ULTTYQ BANKI ەميتەنت بانكتى بىلدىرەتىن «QUB» اببريەۆياتۋراسى بار. مونەتانىڭ وڭ جاق بولىگىندە – قازاقستان تەڭگە سارايىنىڭ تاۋار بەلگىسى (لوگوتيپ).