دۇنيەجۇزىلىك دەنساۋلىق ساقتاۋ ۇيىمى كوروناۆيرۋسقا بايلانىستى حالىقارالىق دەڭگەيدە توتەنشە جاعداي دەپ تانىدى. بۇل تۋرالى ددسۇ-نىڭ باس ديرەكتورى تەدروس گەبرەيەسۋس مالىمدەدى. دەگەنمەن ۇيىم باسشىسى ءوز مالىمدەمەسىندە حالىقارالىق ءىس-ساپارلار مەن ساۋداعا شەكتەۋ قويۋعا نەگىز جوق ەكەنىن ايتتى.
ددسۇ مالىمەتتەرى بويىنشا، قىتايدىڭ وزىندە ۆيرۋستى جۇقتىرعاندار سانى ون مىڭعا جۋىقتاپ، كەمىندە 213 ادام ولگەن. 12 مىڭنان استام ادامنان كوروناۆيرۋس بەلگىلەرىن ىزدەپ جاتىر. ال قىتايدان تىس اۋماقتا ۆيرۋستى جۇقتىرعاندار سانى 100-گە جەتتى. 18 ەلدەن ۆيرۋس تابىلعان.
مامانداردىڭ ايتۋىنشا، ۆيرۋستىڭ ادامدار اراسىندا جۇعۋىنىڭ سەگىز فاكتىسى بار.
ۇيىم سونىمەن قاتار ۆيرۋسقا ۋاقىتشا "2019-nCoV" اتاۋىن بەرۋدى ۇسىندى.
تەدروس ادحان گەبرەيەسۋس بۇل ۆيرۋستى جەڭۋگە بولاتىنىن ەسكەرتتى. ساراپشىلاردىڭ پىكىرىنشە، الەم اۋرۋعا قارسى تۇرۋدى جانە جۇقتىرعان ادامدى وقشاۋلاۋدى ۇيرەنۋى كەرەك. سوندا عانا اۋرۋدىڭ ءورشۋى باسىلادى.
جۇڭگو بيلىگىنە ۆيرۋس بەلگىلەرىن انىقتاۋعا جانە ناۋقاستاردى ساۋىقتىرۋ ءۇشىن ۆيرۋستىڭ كوزىن تابۋعا، حالىقارالىق اۋەجايلار مەن پورتتاردى تەكسەرۋدەن وتكىزۋگە كەڭەس بەرىلدى.
جەلتوقساننىڭ اياعىندا قىتايدىڭ ۋحان قالاسىندا بەلگىسىز پنيەۆمونيانىڭ ءورشۋى تىركەلگەن. ماماندار اۋرۋدىڭ قوزدىرعىشى - كوروناۆيرۋستىڭ جاڭا ءتۇرى "2019-nCoV" دەپ توپشىلادى.
پىكىر قالدىرۋ