3 اقپان كۇنى كەشكە شىمكەنتتە بەلسەندى نۇرلان سىزدىقبەك قالا ورتالىعىندا بيلىككە قارسى ءبىر ادامدىق پيكەت وتكىزىپ، قاۋىپسىزدىك كەڭەسىن تاراتۋدى تالاپ ەتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

سىزدىقبەك قازاقستاندى 30 جىلداي باسقارىپ، بىلتىر ناۋرىزدا پرەزيدەنتىكتەن كەتكەن، ءبىراق قاۋىپسىزدىك كەڭەسىنىڭ ءتوراعاسى رەتىندە بيلىكتىڭ ءبىر تارماعىن ۇستاپ وتىرعان نۇرسۇلتان نازاربايەۆتىڭ ورنىنان كەتۋىن، قاۋىپسىزدىك كەڭەسىن تاراتۋدى دا تالاپ قىلدى. ول قىتايدىڭ قازاقستانداعى جوبالارىنا دا نارازىلىق ءبىلدىردى.

نۇرلان سىزدىقبەك ۇستىنە كيگەن اق قاعازعا "1993 جىلعى كونستيتۋسيا قايتارىلسىن!"، "قاۋىپسىزدىك كەڭەسى تاراتىلسىن!"، "نازاربايەۆ، كەت!"، "جۇڭگو ەكسپانسياسىنا جول جوق!"، "قىتايدىڭ 55 زاۆودى كىرگىزىلمەسىن!" دەپ جازىپ، قالا ورتالىعىنداعى ءىرى ساۋدا ورتالىعىنىڭ الدىندا تۇردى.

بەلسەندى ارى-بەرى وتكەن تۇرعىندارمەن تىلدەسىپ، نەلىكتەن نارازىلىق وتكىزىپ جاتقانىن تۇسىندىرۋگە تىرىستى.

- 1993 جىلى قابىلدانعان كونستيتۋسيادا پرەزيدەنتتىككە ۇمىتكەر ءتورت جىلدان ەكى رەت سايلانۋعا قۇقىلى ەكەنى جازىلعان ەدى. ءبىراق كەيىننەن ءبىر ادامنىڭ مۇددەسى ءۇشىن بىرنەشە رەت وزگەرتىلدى. اتا زاڭ تەك حالىقتىڭ ۇنىمەن رەفەرەندۋم ارقىلى وزگەرتىلۋى كەرەك. قاۋىپسىزدىك كەڭەسىنىڭ بيۋدجەتى شامامەن ءبىر وبلىستىڭ بيۋدجەتىنە تەڭ ەكەن. ءبىر وبلىستا ورتاشا ەسەپپەن ميلليون ادام ءومىر سۇرەدى. وسىنشا حالىقتىڭ نەسىبەسىن ءبىر كەڭەستىڭ جۇمىسىنا جۇمساۋ دۇرىس ەمەس. ءار ادام ءوز ويىن، پىكىرىن بىلدىرۋگە قۇقىلى. ءقازىر ەلدىڭ الەۋمەتتىك جاعدايى ناشار. حالىق كەدەي. جۇمىسسىز جۇرگەن جاستار شەتەل اسىپ كەتىپ جاتىر. وسىنىڭ ءبارى جانىما باتادى، - دەدى بەلسەندى.

بەلسەندىنىڭ نارازىلىعى جارتى ساعاتقا سوزىلدى. ونى پوليسيا قىزمەتكەرلەرى باقىلاپ تۇردى.

شىمكەنت بەلسەندىلەرى سوڭعى ۋاقىتتا بيلىككە تالاپ ايتقان ءتۇرلى نارازىلىق شارالارى كوبەيدى. ولار بيلىكتەن "ساياسي تۇرقىندارعا" بوستاندىق بەرۋدى، "قىمباتشىلىقتى توقتاتۋدى" تالاپ ەتكەن. بەلسەندىلەردىڭ كەيبىرى "بەيبىت ميتينگ وتكىزۋ زاڭىن بۇزدى" دەگەن ايىپپەن ايىپپۇل العان يا بىرنەشە تاۋلىككە قامالىپ شىققان.