الماتى قالاسى قوعامدىق دەنساۋلىق باسقارما باسشىسى تىلەۋحان ابىلدايەۆ بۇگىنگى بريفينگ بارىسىندا ەلدە كوروناۆيرۋستىڭ بەلگىلەرى تابىلعان جاعدايدا، ونىمەن كۇرەسۋگە قاۋقارىمىز جەتەدى جانە وعان قارسى تۇراتىن پرەپاراتتار ءبىزدىڭ قوردا بار دەپ اتاپ ايتتى.

"جۇقپالى اۋرۋلاردىڭ باسقا دا سالاسىنا پايدالانىپ جۇرگەن ۆيرۋسقا قارسى دارى-دارمەكتەردىڭ كوروناۆيرۋسقا تيىمدىلىگى دالەلدەنگەن. ونداي دارىلەر ءبىزدىڭ ينفەكسيالىق ستاسيونارىمىزدا جەتكىلىكتى"، - دەدى باسقارما باسشىسى . 

سونداي-اق ول، قىتايدان كەلگەن ازاماتتار جەكەلەي تەكسەرىستەن ءوتىپ، ءاردايىم باقىلاپ وتىرامىز دەپ جەتكىزدى. 

"قازىرگى ۋاقىتتا ۆيرۋس تاراعان ءقاۋىپتى ايماقتان الماتىعا كەلگەندەر سانى 6320 ادامدى قۇرادى. ولاردىڭ 6234ء-ى قارالعان، ونىڭ 99-ى شەتەلدىك ازاماتتار. قالاداعى پوليكلينيكالاردا فيلتر كابينەتتەرى جاساقتالعان. سونداي-اق ىستىعى كوتەرىلگەندەر، جرۆي جانە تۇماۋ بەلگىسىمەن كەلگەندەردى قارايتىن ارنايى ورىندار قۇرىلدى، دەپ بريفينگ بارىسىندا اتاپ ءوتتى.

سونىمەن قاتار، ول ىندەتكە قارسى كۇرەسۋ ءۇشىن مەملەكەتتىك بيۋدجەتتەن تاعى 30 ملن تەڭگە بولىنگەنىن جانە قوسىمشا بەتپەردەلەر ساتىپ الىنىپ جاتقانىن جەتكىزدى. 

"الماتىدا كوروناۆيرۋس جۇقتىرعاندار انىقتالعان جوق. ءقاۋىپتى ايماقتان كەلگەن 25 ادام جرۆي مەن تۇماۋ بەلگىسىمەن اۋرۋحاناعا جاتقىزىلعان. ولاردىڭ 11ء-ى ءقازىر ەمدەلىپ شىقتى. قالعان 14 ادامنىڭ جاعدايى قالىپتى، جازىلىپ كەلە جاتىر، - دەيدى ابىلدايەۆ.