بۇل تۋرالى Qamshy.kz اقپارات اگەنتتىگى  Skifnews.kz اقپارات پورتالىنا سىلتەمە جاساپ حابارلايدى.

بەلگىلى بولعانداي اۋەلى مارجان راقاي ەسىمدى جەلى قولدانۋشى facebook پاراقشاسىنا تاراز قالاسىنىڭ اكىمىنەن كومەك سۇراي كەلگەن كوپبالالى اتا-انانىڭ ۆيدەوسىن جاريالاعان. 

«قارياسىن قاراماي، قالدىرىپ، قاڭعىتىپ كەتكەن قازاقتار. 11 بالا تۋىپ، ءوسىرىپ، قاناتتاندىرعان قارتتار بۇل! «ءبىرى اكىم، ءبىرى پرەزيدەنت بولادى دەپ، ەشقايسىسىنىڭ بەتىنەن قاقپاي ءوسىردىم»، – دەپ ەگىلەدى كەيۋانا. «بىرەۋىنە دە قول كوتەرىپ، ءتايت دەمەدىم»، – دەپ ەزىلەدى قاريا.

وسى رەتتە، ۆيدەو اۆتورى كەلەڭسىز ءجايىتتى كورىپ جۇرەگى جۇلىنىپ كەتەردەي بولعانىن ايتادى:

"بۇل نە سۇمدىق بولدى، اللام-اي؟! 11 بالاڭ بولا تۇرا، وسى جاسقا كەلگەندە قاراۋسىز قالعان دەگەن قانداي قورقىنىشتى، قانداي قاسىرەت ەدى... قازاق مۇنداي بولماسا كەرەك-تى... كىم بولىپ كەتتىك، قايدا بارامىز؟ وسى قارتتاردىڭ كوز جاسى، نالاسى جىبەرە مە ءبىزدى، كوگەرتە مە ۇرپاعىن؟ ءبىرىن-بىرى سۇيرەلەي، ءبىرىن-بىرى دەمەپ، تاراز قالاسىنىڭ اكىمىنەن كومەك سۇراي كەلىپتى. ءقايتسىن ەندى؟.. كوز جاسىن تىيا الماي وتىرعان كەمپىرىنىڭ بەتىنەن ءسۇرتىپ، «جىلاماشى، جانىم! 18 جاسىندا قولىما قوندىرعان اققۋىم عوي»، – دەپ جۇباتىپ قويادى اتا. كەشىرىڭىزدەرشى ءبىزدى. ءبىز سونداي تاسباۋىر بولىپ بارامىز... ءجانىىم اپا-اي...» دەپ جازدى مارجان راقاي.

جازبا استىنا پىكىر قالدىرعان كوپشىلىكتىڭ اشۋ-ىزاعا تولى سوزدەرى تولاستار ەمەس. قاناتتىعا قاقتىرماي، تۇمسىقتىعا شوقتىرماي وسىرگەن ون ءبىر بالانىڭ وپاسىزدىعى جەلى قولدانۋشىلاردىڭ جيىركەنىشىن تۋعىزدى.

ولاردىڭ ءبىرى «وكىنىشتى، وتە وكىنىشتى! سوندا اناۋ ۇل-قىزدارى قالاي ەل-جۇرتتىڭ كوزىنە قارايدى ەكەن؟ قالاي مىنا قارا جەردىڭ ۇستىندە تابان ءتىلىپ ءجۇر ەكەن؟» دەسە، ەندى بىرەۋلەرى «يت ەكەن بالالارى! باسقا ءسوزىم جوق»، «اللا-اي، بالالارىنىڭ ءوز باستارىنا كەلسىن، ساناسىزدار!»، «قاتىندارىنىڭ سوڭىنان كەتكەن-اۋ، سۇمەلەك ۇلدارى!»، «ايۋان ۇل-قىزداردىڭ اتىن اتاپ، ءتۇسىن تۇستەپ كورسەتۋ كەرەك. جەكجات-جۇراعاتى تانىپ، تەرىس اينالۋى ءۇشىن. سوندا جالعىزدىقتىڭ ءدامىن تاتادى. باسىنا تۇسپەيتىندەي كورىنەتىن شىعار ولارعا. قوعام دەرتىن وسىلاي قوعام بوپ ەمدەۋ كەرەك» – دەپ جاتىر.

ءتىپتى، كەلەسى ءبىر پىكىر يەسىنىڭ «ءبىر اتا-انا ون بالانى باعا الادى، ون بالا جابىلىپ، ءبىر اتا-انانى باعا المايدى. ەەە، «ءبىر كەم دۇنيە» دەگەن ءسوزى جۇرت كوكىرەگىندەگى ويدى ءدوپ باسقانداي.