8 اقپان كۇنى تۇستەن كەيىن جامبىل وبلىسى قورداي اۋدانى قاراكەمەر اۋىلىنا وبلىس باسشىسى اسقار مىرزاحمەتوۆ كەلدى.
قاراكەمەر – كەشە دۇنگەندەر مەن قازاقتار اراسىندا جانجال بولعان اۋىلداردىڭ ءبىرى – ماسانچيگە جاقىن ورنالاسقان ەلدىمەكەن. وندا نەگىزىنەن ەتنيكالىق قازاقتار تۇرادى. قاراكەمەر مەن ءماساچيدى كوپىر عانا ءبولىپ تۇر. قازىرگى كەزدە كوپىردى ارنايى جاساق وكىلدەرى جاۋىپ، كەشەگى جانجال كەزىندە ۇستالعان ازاماتتاردى بوستۋدى تالاپ ەتىپ تۇرعان قاراكەمەر اۋىلىنىڭ تۇرعىندارىن اۋىلدان شىعارماي تۇر.
جينالعاندارعا قامالعانداردىڭ بوساتىلعانىن ايتقان مىرزاحمەتوۆ ولاردان تاراۋىن سۇرادى. وبلىس اكىمى ولارعا "ۋادە بەرەمىن. ءبىرى بوستىلدى. ەشكىم قامالمايدى" دەدى. الايدا تۇرعىندار "قامالعانداردىڭ بوساتىلعانىن كوزبەن كورمەي قايتپايمىز" دەپ تۇر. جينالعاندار ءتىپتى سول جەردە قازان كوتەرىپ، اس ازىرلەپ، قامالعانداردى اقىرىنا دەيىن توسۋعا نيەتتى.
مىرزاحمەتوۆ اۋىل تۇرعىندارىنا كەلگەن كەزدە ۆيدەوعا تۇسىرە باستاعان جۋرنالسيتەرگە ونىڭ قاسىندا جۇرگەن جامبىل وبلىسى اكىمنىڭ باسپا ءسوز قىزمەتى مەن جامبىل وبلىستىق پوليسيا دەپارتامەنتىنىڭ باسشىسى بارلىق قۇرىلعىلارىن ءسوندىرىپ قويۋدى تالاپ ەتىپ، كامەراعا تۇسىرۋگە، ديكتافونعا جازۋعا قاتاڭ تىيىم سالدى. ولار "ءقازىر حالىقپەن سويلەسىپ السىن. ب ا ق وكىلدەرىنە ارنايى سۇحبات بەرەدى" دەدى.
