ق ر ىشكى ىستەر ءمينيسترىنىڭ ورىنباسارى الەكسەي كالايچيدي قوردايداعى وقيعا بويىنشا 10 ادامنىڭ كوز جۇمعانىن ايتتى، دەپ حابارلايدى قازاقپارات.
– 10 ادام كوز جۇمدى. 39 ادام اۋرۋحانادا جاتىر. سونىمەن بىرەگە زارداپ شەككەندەردىڭ ىشىندە بەس پوليسەي بار. ۇشەۋى قارۋدان جارالانعان. الايدا پوليسيا قىزمەتكەرلەرى ەشقانداي قارۋدىڭ قولدانباعانىن ايتقىم كەلەدى، – دەدى الەكسەي كالايچيدي وكق-دا وتكەن باسپا ءسوز ءماسليحاتىندا.
سونداي-اق الەكسەي كالايچيدي قوردايداعى وقيعانىڭ نەدەن باستالعانىن ايتىپ بەردى.
– ءاۋ باستا، ياعني 5 اقپاندا ەكى اۋىلدىڭ تۇرعىندارى ۇستاسىپ قالعان. تۇرمىستىق قاقتىعىسقا قاتىسقانداردىڭ ءبىرى ءقازىر ۇستالىپ، قالعاندارى اۋداننان شىقپايتىنى جونىندە قولحاتپەن بوساتىلدى، – دەدى الەكسەي كالايچيدي.
ونىڭ ايتۋىنشا، اۋىر جۇك كولىگى ۇيدەن شىعىپ كەلە جاتقان كەزدە جولدا كەلە جاتقان اۆتوكولىكپەن جولعا تالاسىپ قالعان.
– كولىكتەردە ءۇش-ۇش ادامنان بولعان. اقىرى ءوزارا جانجال سوڭى توبەلەسكە ۇلاسىپ كەتكەن، – دەدى ول.
ءىىم باسشىسىنىڭ ورىنباسارى جول ۇستىندەگى توبەلەستە التى كىسىنىڭ ىشىندە، شىنىندا دا، جاسى ۇلكەن كىسىنىڭ بولعانىن راستادى.
– ول توبەلەس كەزىندە زارداپ شەككەن... جالپى ءقازىر ءبىز بارلىق تاراعان اقپاراتقا تالداۋ جۇرگىزىپ وتىرمىز. ول جەردە جۇزگە تارتا ادام بولعان. ولاردىڭ ءارقايسىسىنىڭ سول جەرگە كەلۋ ءموتيۆىن زەرتتەپ جاتىرمىز، – دەدى ول.
پىكىر قالدىرۋ