قازاقستان پرەزيدەنتى قاسىم-جومارت توقايەۆتىڭ جارلىعىمەن جامبىل وبلىسىنىڭ اكىمى اسقار مىرزاحمەتوۆ قىزمەتىنەن بوساتىلدى. بۇل تۋرالى 10 اقپاندا اقوردا سايتى حابارلادى.
اقوردانىڭ جازۋىنشا، مىرزاحمەتوۆ قىزمەتىنەن كەتۋگە ءوزى ءوتىنىش بەرگەن. ال ونىڭ ورنىنا جامبىل وبلىسىنا كىم اكىم بولاتىنى ءالى بەلگىسىز.
اسقار مىرزاحمەتوۆ جامبىل وبلىسىنا باسشىلىققا 2018 جىلدىڭ قاڭتارىندا كەلگەن. وعان دەيىن ول اۋىل شارۋاشىلىعى ءمينيسترى، پرەمەر-مينستردىڭ ورىنباسارى قىزمەتىن اتقارعان. التى جىل وڭتۇستىك قازاقستان (قازىرگى تۇركىستان وبلىسى) وبلىسىندا اكىم بولعان. 57 جاستاعى مىرزاحمەتوۆتىڭ قانداي قىزمەتكە باراتىنى ءالى بەلگىسىز.
بۇعان دەيىن توقايەۆ ءوز جۇمىسىنا سالعىرت قارادى دەپ جامبىل وبلىسىنىڭ اكىمى اسقار مىرزاحمەتوۆكە ءوزىنىڭ الەۋمەتتىك ماسەلەلەر جونىندەگى ورىنباسارى سۇلۋشاش قۇرمانبەكوۆانى جانە قورداي اۋدانىنىڭ اكىمى ب.بايتولەنى، ال ىشكى ىستەر ءمينيسترى ەرلان تۇرعىمبايەۆقا جامبىل وبلىسى پوليسيا دەپارتامەنتىنىڭ باستىعى ارمان ورازالييەۆ جانە قورداي اۋداندىق پوليسيا ءبولىمىنىڭ باستىعى ا.ايقىمبەكوۆتى قىزمەتىنەن بوستۋدى تاپسىرعان ەدى.
اقپاننىڭ 7ء-سى كۇنى جامبىل وبلىسى قورداي اۋدانىندا بولعان ەتنيكالىق جانجالدا 10 ادام قايتىس بولدى، 40-تان استام ادام جاراقاتتانعان. 36 تۇرعىن ءۇي مەن 11 كوممەرسيالىق نىسان جانە 44 اۆتوكولىك ورتەنگەن.
ەتنيكالىق جانجالدىڭ شىعۋ سەبەبى ناقتى بەلگىسىز. ءبىراق قاراكەمەر اۋىلى تۇرعىندارىنىڭ سوزىنشە، جانجال ەتنيكالىق دۇنگەندەر مەن قازاقتاردىڭ كولىكپەن كەلە جاتىپ، جولعا تالاسۋىنان باستالعان.
پىكىر قالدىرۋ