الماتىدا وسىدان 14 جىل بۇرىن جانىنداعى ەكى سەرىگىمەن بىرگە قاستاندىقپەن ولتىرىلگەن وپپوزيسيا قايراتكەرى التىنبەك سارسەنبايۇلىن ەسكە الدى. "استانا" قوناق ۇيىندە وتكەن شاراعا ساياساتكەرلەر، ازاماتتىق بەلسەندىلەر، قۇقىق قورعاۋشىلار مەن جازۋشىلار قاتىسىپ، مارقۇم تۋرالى ەستەلىك ايتتى. بۇل تۋرالى azattyq حابارلايدى.
التىنبەك سارسەنباي ۇلىنىڭ اعاسى جۋرناليست رىسبەك سارسەنباي شارادا وقىعان "ارناۋلى بايانداما" اتتى ۇندەۋىندە باۋىرىنىڭ قازاسىنا بايلانىستى ەلدىڭ ەكس-پرەزيدەنتى نۇرسۇلتان نازاربايەۆ پەن ونىڭ ۇلكەن قىزى، ءقازىر پارلامەنت سەناتىنىڭ سپيكەرى داريعا نازاربايەۆادان جاۋاپ الۋعا شاقىردى.
"قازانىڭ قۇپياسى ءالى تولىق اشىلمادى. تاپسىرىس بەرۋشىنىڭ ءاتى-جونى ناقتى اتالمادى. نەگىزگى كۇدىكتىلەر تاسادا قالىپ قويدى. نازاربايەۆ كۇيەۋ بالاسى [راحات] الييەۆتى دەر كەزىندە جاۋاپقا تارتقان جوق" دەدى ول.
– اعامنىڭ قازاسىنا بايلانىستى كۇدىكتى رەتىندە ەكس-پرەزيدەنت پەن ونىڭ قىزىنان جاۋاپ الۋدى تالاپ ەتەمىن. سونداي-اق "ەلباسى تۋرالى زاڭ" جويىلسىن. پرەزيدەنت قاسىم-جومارت توقايەۆ وسى تالابىمىزدى ورىنداسىن، – دەدى اعاسى رىسبەك سارسەنباي ۇلى. ول ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، ءقازىر شەتەلدە تۇراتىن ءالنۇر مۇسايەۆ تا جاۋاپقا تارتىلۋى كەرەك دەپ سانايدى.
وپپوزيسيا جەتەكشىسى التىنبەك سارسەنباي ۇلى مەن ونىڭ ەكى كومەكشىسى ۆاسيليي جۋراۆليەۆ پەن باۋىرجان بايبوسىندى 2006 جىلى 11 اقپاندا الماتىدا ۇرلاپ اكەتكەن. قارۋدان اتىپ ولتىرىلگەن ۇشەۋىنىڭ سۇيەگى ەكى كۇننەن كەيىن الماتى ىرگەسىندەگى تاۋ بوكتەرىنەن تابىلعان بولاتىن.
پىكىر قالدىرۋ