20-دان استام ۆولونتەرلار ۇيىمدارىنىڭ وكىلدەرى قاتىسقان كەزدەسۋدىڭ باستى ماقساتى – مەملەكەت باسشىسى ۆولونتەر جىلى دەپ جاريالاعان بيىلعى جىلى اتقارىلاتىن جۇمىستاردىڭ جوسپارى بويىنشا «ساعاتتى سالىستىرۋ».

الماتى اكىمى باقىتجان ساعىنتايەۆ اتاپ وتكەندەي، ىزگى نيەتتى قالالىقتار ءومىر ءسۇرۋدىڭ بارلىق سالالارىندا بەلسەندى جانە قالا قاۋىمداستىعىنىڭ اجىراماس بولىگىنە اينالعان.

كەزدەسۋ كەزىندە ايتىلعان ۇسىنىستار – مەيىرىمدىلىكتىڭ قالالىق شەرۋىن، ەكولوگيالىق جۇگىرۋدى ۇيىمداستىرۋ، قالانى جاسىلداندىرۋعا قاتىسۋ، تۇرعىندارعا قۇقىقتىق كومەك كورسەتۋ جانە وقۋشىلاردىڭ زاڭنامالىق ساۋاتتىلىعى بويىنشا ساباقتار وتكىزۋ. از قامتىلعاندارعا، جالعىز باستى قارت ادامدارعا جانە ەرەكشە قاجەتتىلىكتى تالاپ ەتەتىن بالالارعا كومەك كورسەتىلەدى. سونىمەن قاتار، ۆولونتەرلار دونورلىقتى قولدايدى ءارى العاشقى مەديسينالىق كومەك كورسەتۋدىڭ نەگىزدەرىن ۇيرەتەدى. قالدىقتاردى جەكە جيناۋ، حايۋاناتتاردى قورعاۋ مەن ساقتاۋ ماسەلەلەرى دە ماڭىزدى.

قالا اكىمى ب. ساعىنتايەۆ ۆولونتەرلىق جوبالاردىڭ بارلىعىنىڭ قولداۋ تاباتىندىعىن ايتتى.

– ۆولونتەرلىق قوزعالىس ساليقالى الەۋمەتتىك-جاۋاپتى ىسكە اينالۋدا. سوندىقتان ۆولونتەرلار توپتارىن دايىنداۋ، ءبىرىڭعاي اقپاراتتىق بازانى قۇرۋ ماڭىزدى. كۇش-جىگەرىمىز بەن رەسۋرستاردى بىرىكتىرە وتىرىپ، ءبىز بۇل مىندەتتەردىڭ بارلىعىن شەشەمىز. وسى ماقسات ءۇشىن ۆولونتەرلار مەن قوعامنىڭ ءوزارا ءىس-قيمىلىنىڭ ءتيىمدى الاڭىنا اينالاتىن ۆولونتەرلار ءۇيىن اشامىز، – دەپ قورىتىندىلادى ءسوزىن الماتى اكىمى باقىتجان ساعىنتايەۆ.

كەزدەسۋدە «قازاقستان ۆولونتەرلار ليگاسى» قق-نىڭ ءتورايىمى ايسۇلۋ ەرنيازوۆا، «مەيىرىمدىلەر كلۋبى» جوباسىنىڭ ۇيلەستىرۋشىسى دينارا اسانوۆا، Lider.kz قق-نىڭ ۇيلەستىرۋشىسى ديلميرا بلاس، «قۋانىش سىيلايمىزدىڭ» ۇيلەستىرۋشىسى كيرا ۋدارسيەۆا جانە باسقالارى ءوز ۇسىنىستارىمەن ءبولىستى.