بۇل تۋرالى پرەزيدەنت قاسىم-جومارت توقايەۆ ەلورداداعى «Birgemiz» رەسپۋبليكالىق فرونت-كەڭسەسىنىڭ اشىلۋ سالتاناتىندا ايتتى دەپ حابارلايدى Qamshy.kz اقپارات اگەنتتىگى قازاقپارات دەرەگىن نەگىزگە الىپ. 

كەزدەسۋدە مەملەكەت باسشىسى اۋەلى ەرىكتىلىكتىڭ باستى ماقساتىن اتاپ ءوتتى.

«ۆولونتەرلەر قوزعالىسى ازاماتتىق قوعامدى ودان ارى دامىتۋعا مۇمكىندىك بەرەدى. ۆولونتەرلىك دەگەنىمىز – ءبىر جەڭنەن قول، ءبىر جاعادان باس شىعارىپ ارەكەت ەتۋ. ەرىكتىلىك – حالقىمىزدىڭ شىنايى بولمىسى، ءسالت-داستۇرى. سوندىقتان، ءبارىمىز مىندەتتى تۇردە بۇل ءداستۇردى ساقتاپ قالۋىمىز كەرەك. بۇل باستاما – ۇلتتى ۇيىستىرىپ، مەملەكەتتى نىعايتۋ ءۇشىن قاجەت»، – دەدى پرەزيدەنت. 

سونىمەن بىرگە، ول وتانعا دەگەن ماحاببات – قۇر ۇران مەن بوس دەكلاراسيا ەمەس ەكەنىن دە ايتتى:

«سوندىقتان ءبىز ۆولونتەرلىكتى كەڭىنەن دارىپتەۋىمىز كەرەك. بەرەكە-بىرلىگىمىزدى ارتتىراتىن شارالارعا تۇتاس ۇلت بولىپ، اتسالىسۋىمىز قاجەت. وسىندا وتىرعان ۆولونتەرلەردىڭ بارلىعى – سىزدەر ەلىمىزدىڭ پاتريوتىسىزدار. وتانعا دەگەن ماحاببات – قۇر ۇران مەن بوس دەكلاراسيا ەمەس، بۇل –حالىق ءۇشىن اتقارىلاتىن كۇن سايىنعى ەڭبەگىمىز. بۇل – جاننىڭ جاي-كۇيى، اۋقىمدى ءبىلىم مەن ءوزىن ۇستاۋدىڭ ۇلگىلى مادەنيەتى. مەن سىزدەردى وسى ءۇشىن قاتتى قۇرمەتتەيمىن»، - دەدى ول.

اتاپ وتەيىك، بۇگىن پرەزيدەنت قاسىم-جومارت توقايەۆ ەكسپو كورمەسىنىڭ «Art Hub» پاۆيلونىندا ورنالاسقان ۆولونتەرلەردىڭ «Birgemiz» رەسپۋبليكالىق فرونت-كەڭسەسىنىڭ اشىلۋ سالتاناتىنا قاتىسۋدا. شارا بارىسىندا  «QQQAZVOLUNTEER.KZ» ونلاين-پلاتفورماسىنىڭ قىزمەتى جانە ۆولونتەرلىكتىڭ «Bilim»، «Qamqor»، «Úmit»، «Sabaqtastyq»، «Taza Álem» جانە «Saulyq» اتتى 7 سالالىق باعىت بويىنشا الاڭدار تانىستىرىلادى دەپ جوسپارلانعان.