قوعامدا زور ءدۇمپۋ تۋدىرعان «ماسانشى» وقيعاسى ءبىراز شەنەۋنىكتىڭ تاعدىرىن شەشتى. ءاۋىس-تۇيىس تە ءالى اياقتالماعان سىڭايلى
ايتالىق، وسىعان دەيىن وبلىس باسشىسى اسقار مىرزاحمەتوۆ پەن پوليسيا دەپارتامەنتىنىڭ باستىعى ارمان ورازالييەۆ قىزمەتتەرىنەن كەتسە، ەندى جامبىل وبلىسىنىڭ پروكۋرورى جارقىن قۇسايىنوۆ تا وسى تىزىمگە قوسىلدى.
ءسويتىپ، مەملەكەت باسشىسىنىڭ كەلىسىمى نەگىزىندە ق ر باس پروكۋرورىنىڭ بۇيرىعىمەن جامبىل وبلىسىنىڭ پروكۋرورى بولىپ 3-سىنىپتى مەملەكەتتىك ادىلەت كەڭەسشىسى نۇرعالىم ءماجيت ۇلى ءابدىروۆ تاعايىندالدى.
ال، وسىعان دەيىن جامبىل وبلىسى پروكۋرورى لاۋازىمىن اتقارعان ج.ق. قۇسايىنوۆ باس پروكۋراتۋرانىڭ قاراماعىنا اۋىستى.
ن. ءابدىروۆ 1967 جىلى تۋعان. قاراعاندى مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن.
پروكۋراتۋرا ورگاندارىندا قىزمەتىن 1991 جىلى باستاعان.
باس پروكۋراتۋرانىڭ ءۇش دەپارتامەنتىن باسقارعان.
ءنۇر-سۇلتان، الماتى، وڭتۇستىك-شىعىس وڭىرلىك كولىك پروكۋرورلارىنىڭ ءبىرىنشى ورىنباسارى قىزمەتىن اتقارعان، اقتوبە، وڭتۇستىك قازاقستان جانە تۇركىستان وبلىسى پروكۋراتۋرالارىنا باسشىلىق ەتكەن.
پروكۋراتۋرا ورگاندارىنداعى ەڭبەك ءوتىلى 28 جىلدان اسقان.
پىكىر قالدىرۋ