بايقاپ وتىرمىن، كەيبىر پوپۋليستەر وسى تراگەديادان بەدەل جيناپ قالۋعا تىرىسىپ، وقۋعا تاتىمايتىن پوستتار جازىپ جاتىر. ۇلتارالىق جاعدايدى اسقىندىرمايىق. ەندى ءوز ويىمدى ايتسام:

1. دۇنگەندەردىڭ اسكەرگە بارمايتىنىن تەكسەرىپ، ناقتىسىن ءبىلۋ كەرەك. ەگەر وسىلاي بولىپ جاتقانى راس بولسا، وندا ۆوەنكوماتتاردى جەمقورلىق جايلاعان دەگەن ءسوز. سول جەردە ءوزىمىزدىڭ قازاقتار وتىر عوي. اسكەرگە دۇنگەندەر عانا ەمەس، وزىمىزدەگى دوكەيلەردىڭ بالالارى دا بارمايدى. سوندىقتان بۇل جەردە بار پالەنى ۇلتتان كورمەي، بيلىكتەگى جەمقورلىقتان كورگەن دۇرىستاۋ بولادى..

2. دۇنگەن بالالارىنىڭ مەكتەپكە بارمايتىنى. بۇل دا جەرگىلىكتى بيلىكتىڭ قىرسىزدىعىنان. ءبىلىم ءبولىمى، بالالاردى قورعايتىندار، ت.ب بيلىكتىڭ ورگاندارى بار. سولاردى ىسكە قوسىپ، اتا-اناسىن حۇقىنان ايىرىڭىزدار. الدە ول قولدان كەلمەي مە؟ ەگەر قولدان كەلمەسە، وندا سىزدەردى نە ساتىپ الدى، نە پوليسەيلەر مىندەتىن دۇرىس اتقارماي ءجۇر دەگەن ءسوز!

3. ناۋرىزعا بايلانىستى. ولاردىڭ ناۋرىزدى تويلامايتىن سەبەبىن دىننەن ىزدەپ كورۋ كەرەك سياقتى. ناۋرىز دەگەن زايىرلى مەرەكە ەمەس. يسلامعا دەيىنگى پۇتقا تابىنۋشىلاردىڭ داستۇرىنەن شىققان مەرەكە بولاتىن. مەنىڭشە بۇنى وسىلاي تۇسىنگەن دۇرىس. ونى اتاپ وتە مە، اتاپ وتپەي مە، ول اركىمنىڭ ءوز شارۋاسى دەپ ويلايمىن. مەرەكەنى كۇشتەپ تۇرىپ تويلاتاتىن ادەت ساۆەت كەزىندە بولعان.

4. قازاق تىلىنە بايلانىستى. قازاقستاندا تۇراتىن دياسپورالاردىڭ قازاق ءتىلىن ءبىلۋى مىندەت. بۇعان كوڭىل بولەتىن ۋاقىت باياعىدا بولدى.

5. مەشىتتەگى ۋاعىز. مەشىتتە ۋاعىزدى قازاق تىلىندە عانا ايتۋ كەرەك.

6. كوشەنىڭ ورتاسىمەن جۇرۋگە بايلانىستى. ەگەر راس بولسا، ول دا جەرگىلىكتى بيلىكتىڭ جاۋاپسىزدىعىنان بولىپ جاتقان نارسە. بۇل دەگەنىڭ ناعىز بىلىق دەگەن ءسوز. زاڭنىڭ الدىندا ءبارى بىردەي.

7. سوڭعىسى، وسىنداي كەزدە ەڭ وڭاي جولدى تاۋىپ الىپ، بار كىنانى ءبىر كىسىگە ۇيىپ-توگىپ قۇتىلۋعا تىرىساتىن ءبىر جامان ادەت بار بىزدە. ادامداردى سوسىن ۇلتىنا، تۇرمىسىنا قاراپ الالاۋ باستالادى. مۇنداي كەزدە ونسىز دا سىركەسى سۋ كوتەرمەي جۇرگەن حالىق ودان زورعىسىنا بارۋى مۇمكىن. «اقىل دوس، اشۋ دۇشپان» دەگەن قازاقتا ماقال بار عوي.

سوندىقتان اسىقپاي، سابىر ساقتاپ، ءبارىن جەتى رەت ولشەپ بارىپ، ءبىر رەت كەسۋ كەرەك. ايتپەسە، بولاشاقتا بۇدان دا قيىن بولۋى مۇمكىن. قازاقستاندا تۇراتىن باسقا دياسپورالاردىڭ اراسىندا دا نەبىر تاماشا ادامدار بار، ونى دا ۇمىتپايىق!