ورتالىق كوممۋنيكاسيالار قىزمەتىندە وتكەن باسپا ءسوز كونفەرەنسياسىندا قازاقستان رەسپۋبليكاسى ۇلتتىق ەكونوميكا مينيسترلىگى ستاتيستيكا كوميتەتىنىڭ ءتوراعاسى نۇربولات ايداپكەلوۆ 2020 جىلى وتەتىن ۇلتتىق حالىق ساناعى تۋرالى مالىمدەدى.

حالىق ساناعى شارتتى ەكى كەزەڭنەن تۇرادى. دايىندىق كەزەڭى. ماۋسىم ايىنىڭ 1 مەن 30 ارالىعىندا ينتەرۆيۋەرلەر تۇرعىن ۇيلەر مەن تۇرعىن ەمەس ءۇي-جايلاردىڭ، قۇرىلىستاردىڭ، سونداي-اق ونداعى تۇراتىن تۇرعىنداردىڭ ناقتى سانىن انىقتاۋ ماقساتىندا ءاربىر ەلدى مەكەندى ارالاپ شىعادى. بۇل كەزەڭدە اۋدانداستىرۋعا دايىندىق جۇرگىزىلەدى. ساناقتىق اۋدانداستىرۋ – بۇل وڭىردەگى ءاربىر ەلدى مەكەننىڭ اۋماعىن ساناقتى وتكىزۋ ءۇشىن نۇسقاۋشىلىق جانە ەسەپتىك ۋچاسكەلەرگە ءبولۋ.

نەگىزگى كەزەڭ (قازان ايىنىڭ 1 مەن 30 ارالىعى).

قازان ايىنىڭ 1 مەن 15 ارالىعىندا، ياعني تىكەلەي حالىق ساناعىنىڭ العاشقى 15 كۇنىندە ينتەرنەت-ساۋالناما جۇرگىزىلەدى. ينتەرنەت-ساۋالنامادا رەسپوندەنتتەر وزىنە جانە وتباسى مۇشەلەرىنە ينتەرنەت جەلىسى ارقىلى sanaq.gov.kz ارنايى سايتىندا ساناق پاراقتارىن ءوز بەتىنشە تولتىرادى. سونىمەن بىرگە سايتتا رەسپوندەنتتەرگە ارنالعان تۇسىندىرمەلەر مەن ارنايى ۆيرتۋالدى كومەكشى دە بار.

ينتەرنەت-ساۋالنامامەن قاتار 1-30 قازان ارالىعىندا ينتەرۆيۋەرلەر جاپپاي ساۋالناما جۇرگىزەدى. ساۋالناما جاۋاپتارى پلانشەتكە ەنگىزىلەدى. ينتەرنەت ارقىلى مالىمەتتەر بەرگەن رەسپوندەنتتەر ينتەرۆيۋەرلەر جۇرگىزەتىن ساۋالناماعا قاتىسپايدى. حالىققا ساۋالناما جۇرگىزۋ بارىسىندا رەسپوندەنتتى سايكەستەندىرۋ ءۇشىن سۇرالاتىن ادامنىڭ ءجسن-ى پايدالانىلادى. ساۋالناما اياقتالعاندا حالىق ساناعىنان وتكەنى تۋرالى انىقتاما بەرىلەدى. 2018 جىلدان باستاپ 2022 جىل ارالىعىندا قازاقستان رەسپۋبليكاسىنىڭ ۇلتتىق حالىق ساناعىنا دايىندىق جانە وتكىزۋ ءۇشىن كوميتەتكە 8 211 ملن تەڭگە سوماسىندا قارجى قاراستىرىلعان.

تىكەلەي حالىق ساناعىن وتكىزۋ كەزەڭىندە 2020 جىلى ۋاقىتشا ساناق پەرسونالى رەتىندە (نۇسقاۋشى-باقىلاۋشىلار، ينتەرۆيۋەرلەر) 32،5 مىڭ ادامدى جۇمىسقا تارتۋ جانە ورنالاستىرۋ جوسپارلانۋدا. جالداناتىن ازاماتتارعا قويىلاتىن تالاپتار: 18 جاستان اسقان قازاقستان رەسپۋبليكاسىنىڭ ازاماتى، باستاماشىل، جاۋاپتى، تەز ءتىل تابىساتىن بولۋى قاجەت. جۇمىس ءوتىلى مەن كاسىبي بىلىمىنە تالاپتار قويىلمايدى، پلانشەتپەن جۇمىس ىستەي ءبىلۋى كەرەك.

اقپارات ءۇشىن حالىق ساناعىن جۇرگىزۋ كەزىندە ينتەرۆيۋەردە تومەندە كورسەتىلگەندەر بولۋى قاجەت:

• اۋماقتىق ستاتيستيكا ورگانىنىڭ قولى قويىلعان جانە ءمورى باسىلعان، فوتوسۋرەتى بار، ءاتى-جونى جازىلعان، بەرىلگەن كۇنى مەن قولدانىلۋ مەرزىمى كورسەتىلگەن ينتەرۆەر كۋالىگى.
• حالىق ساناعىنىڭ سيمۆوليكاسى بار كوك ءتۇستى شارف.
• حالىق ساناعىنىڭ سيمۆوليكاسى بار كوك ءتۇستى پورتفەل. تۇرعىن ۇيلەرگە بارعان كەزدە ينتەرۆيۋەرلەردە حالىق ساناعىنىڭ لوگوتيپى بار كۋالىك، سومكە، شارفتىڭ بولۋى مىندەتتى.
  ساناق پەرسونالىمەن وتەۋلى قىزمەت كورسەتۋ شارتتارى جاسالادى. تولىق كولەمدە 30 كۇنگە قىزمەت كورسەتىلگەن كەزدە دايىندىق كەزەڭىنىڭ ينتەرۆيۋەرىنە (تىركەۋشىگە) كورسەتىلگەن قىزمەتتەرى ءۇشىن 75 743 تەڭگە تولەۋ جوسپارلانعان. تولىق كولەمدە 30 كۇنگە قىزمەت كورسەتىلگەن كەزدە نەگىزگى كەزەڭ ينتەرۆيۋەرىنە (ساناقتان وتكىزۋشىگە) كورسەتىلگەن قىزمەتتەرى ءۇشىن 94 678 تەڭگە تولەۋ جوسپارلانعان.

تولىق كولەمدە 45 كۇنگە قىزمەت كورسەتىلگەن كەزدە دايىندىق جانە نەگىزگى كەزەڭدەردىڭ نۇسقاۋشى-باقىلاۋشىسىنا كورسەتىلگەن قىزمەتتەرى ءۇشىن 113 614 تەڭگە تولەۋ جوسپارلانعان.