جامبىل وبلىسىنىڭ اكىمى بەردىبەك ساپاربايەۆ قورداي اۋدانىنا جۇمىس ساپارى بارىسىندا قۇقىق قورعاۋ ورگاندارى باسشىلارىنىڭ قاتىسۋىمەن توتەنشە جاعدايلاردى جويۋ جونىندەگى ايماقتىق شتاب وتىرىسىن وتكىزدى. بۇل تۋرالى وبلىس اكىمىنىڭ باسپا ءسوز قىزمەتى حابارلايدى.

وبلىستىق شتابتىڭ مالىمەتىنشە، قورداي جانجالىنا 185 ازامات جاراقات العان، ونىڭ 34ء-ى اۋرۋحاناعا جاتقىزىلدى. سونداي-اق 39 تۇرعىن ءۇي، 20 ساۋدا نىسانى جانە 47 اۆتوكولىك ورتەنگەن.

– 7-13 اقپان ارالىعىندا 23 131 ادام قورداي، قاراسۋ، اۋحاتتا، سورتوبە وتكىزۋ پۋنكتتەرى ارقىلى قىرعىز رەسپۋبليكاسىنا كەتتى، 21 261 ادام كىردى، – دەپ حابارلادى اكىمدىك.

قازىرگى تاڭدا اۋىلداردى تازارتۋ جۇمىستارىنا 250 ادام مەن 53 تەحنيكا جۇمىلدىرىلدى، 680 توننا قۇرىلىس قالدىقتارى شىعارىلدى. سونىمەن قاتار 55 دۇكەن، 3 ءدارىحانا، 14 جانارماي قۇيۋ ستانسياسى جانە باسقا دا 30 ساۋدا نىسانى بار.

جوعالعان قۇجاتتاردى قالپىنا كەلتىرۋ ءۇشىن سورتوبا اۋىلدىق وكرۋگى اكىمدىگىنىڭ عيماراتىندا ورنالاسقان جىلجىمالى حالىققا قىزمەت كورسەتۋ ورتالىعى قۇرىلدى. 54 تۋۋ تۋرالى كۋالىك، 48 جەكە كۋالىك، بالالارعا ارنالعان 1193 كۋالىك، 15 جىلجىمايتىن مۇلىك قۇجاتى، 8 نەكە كۋالىگى، 1 ءتولقۇجات بەرىلدى. ال، زارداپ شەككەن 778 وتباسىنا ازىق-تۇلىك جانە قاجەتتى تاۋارلار تۇرىندە 57،2 توننا كولەمىندە گۋمانيتارلىق كومەك كورسەتىلدى.

كەزدەسۋ ناتيجەسىندە وبلىس اكىمى بەردىبەك ساپاربايەۆ تۇرعىنداردىڭ قاۋىپسىزدىگىن قامتاماسىز ەتۋ، بۇلىنگەن نىسانداردى، مۇلىكتەردى، قۇجاتتاردى قالپىنا كەلتىرۋ جانە ەلدى مەكەندەردەگى قالىپتى ءومىردى قالپىنا كەلتىرۋ جونىندە ءبىرقاتار تاپسىرمالار بەردى.