Facebook جەلىسىندە ايسۇلتان راحات جاريالاعان جازبالاردىڭ ارتىندا شەتەلدە تۇراتىن وپپوزيسيالىق ساياساتكەر مۇحتار ءابلازوۆ تۇرعان بولۋى مۇمكىن.

وپپوزيسيونەر facebook-تەگى پاراقشاسىندا "مەن، ايسۇلتان نازاربايەۆ. پاراقشامدا جاريالانعان جازبالاردى ءوزىم جازدىم. بۇل ءوز قالاۋىم، وعان ەشكىم ىقپال ەتپەدى. بۇل مەنىڭ اككاۋندىم، مەنىڭ ويىم، مەنىڭ تالاپتارىم" دەلىنگەن پوست جاريالاپ، كوپ ۇزاماي ونى وشىرگەن.

ونىڭ بۇل جازباسىن بلوگەر دەنيس كريۆوشەيەۆ سكرينشوت جاساپ ۇلگەرگەن.

بلوگەر ءوزىنىڭ پاراقشاسىنا اتالعان سۋرەتتى جاريالاي وتىرىپ، "ەندى بارلىقتارىڭىزعا تۇسىنىكتى بولعان شىعار. مۇحتار اككاۋندتاردى شاتاستىرىپ الدى ما؟ اقپاراتتى ول دەرەۋ ءوشىردى. ءبىراق سكرينشوت دەگەن ۇلى نارسە عوي" دەگەن جازبا قالدىرعان.

مۇحتار ءابلازوۆ سوڭعى جازباسىندا حالىققا ايسۇلتان راحاتتان facebook پاراقشا وزىنە تيەسىلى ەكەنىن دالەلدەۋ ءۇشىن جازبالاردىڭ بارلىعىن ءوزىنىڭ جازعانىن مالىمدەۋدى ايتىپ، "مەن، ايسۇلتان نازاربايەۆ. پاراقشامدا جاريالانعان جازبالاردى ءوزىم جازدىم. بۇل ءوز قالاۋىم، وعان ەشكىم ىقپال ەتپەدى. بۇل مەنىڭ اككاۋندىم، مەنىڭ ويىم، مەنىڭ تالاپتارىم" دەپ جازۋىن سۇراعان.

اتالمىش ءماتىن جازىلعان جازبانىڭ ءابلازوۆ پاراقشاسىندا جاريالانىپ، ۇزاماي ءوشىرىلۋى ايسۇلتان راحاتتىڭ پاراقشاسىن ءابلازوۆ پايدالانىپ وتىرعان بولۋى مۇمكىن دەگەن ويدى تۋدىردى.

بۇعان دەيىن اقپارات جانە قوعامدىق دامۋ ءمينيسترى داۋرەن ابايەۆ ايسۇلتان راحات داۋلى جازبالاردى الدەكىمدەردىڭ ىقپالىمەن جاريالاعان دەپ مالىمدەگەن.