ۋحاننان ەۆاكۋاسيالانعان ستۋدەنتتەر نۇر-سۇلتانداعى كارانتيننەن كەيىن العان اسەرلەرىمەن ءبولىستى. ولاردىڭ ايتۋىنشا قازىرگى تاڭدا قالا ىشىندە ادام قورقاتىنداي ۆيرۋستىڭ بەلگىلەرى جوق. 

– بىزگە ۋحاننىڭ جابىلۋى تۋرالى اقپارات 22 قاڭتاردا كەلدى. وزدەرىڭىز بىلەتىندەي، بۇل ۋاقىتتا قىتايدا جاڭا جىل بولاتىن. ءبىز وندا بىرنەشە جىل تۇرعاندىقتان، مەرەكەگە دەيىن ازىق-تۇلىكتى الدىن-الا ساتىپ الاتىنبىز.  ويتكەنى، دۇكەندەر جارتى كۇن جۇمىس ىستەپ، سودان كەيىن مەرەكەلەرگە بايلانىستى جابىلادى. كەيىننەن قالانى جابۋ تۋرالى حابارلاما كەلگەنىن ەستىدىك. ءبارى كەلىسىلىپ، جوسپارلى تۇردە جاسالعاندىقتان، ەشكىمدە تولقۋ بولمادى. الەۋمەتتىك جەلىدە تاراپ جاتقان اقپاراتتاردىڭ كىم جانە قانداي ماقساتپەن جاسالىنىپ وتىرعانىن بىلمەيمىز. ءبىراق، قالادا سوڭعى نان ءۇشىن ەشقانداي توبەلەستىڭ بولماعانى راس، – دەپ ءتۇسىندىردى قىتايلىق ستۋدەنت گۇلباقىت بولاتبەك قىزى.

ونىڭ ايتۋىنشا، ۋنيۆەرسيتەتتىڭ اۋماعى ۇلكەن. ياعني ستۋدەنتتەرگە بارلىق جاعداي جاسالعان.

– دەمالۋ، كوڭىل كوتەرۋ ورىندارى، مىسالى تەاتر نەمەسە كينو ت.ب. سوندىقتان، كارانتين جاريالانعاننان كەيىن كامپۋستى ەشكىم تاستامادى جانە كوروناۆيرۋستىڭ ايقىن بەلگىلەرى بار ازاماتتار كەزدەسپەدى. ەگەر دە شەكارانى اشىپ، جاعداي رەتتەلىپ جاتسا، كەرى قىتايعا ورالىپ، الداعى جوسپارلارىمدى ورىندايمىن. ەستۋىمشە، كەيبىر ستۋدەنتتەردىڭ اتا-انالارى وقۋدى قازاقستانعا اۋىستىرىپ، وسىندا جالعاستىراتىنىن اتاپ ءوتتى.

اۋرۋحانادا ستۋدەنتتەرگە بارلىق جاعداي جاسالعان. اتاپ ايتار بولسام وندا ءبىزدى كۇنىنە 4  رەت تاماقتاندىرىپ، دارىگەرلەردە ءجيى كەلىپ تەكسەرىپ، بىزبەن ۇنەمى بايلانىستا بولىپ، قولداۋ كورسەتتى. سونىمەن قاتار، جاعداي ءجىتى باقىلاۋدا بولعاندىقتان 4 كۇن سايىن توسەك-ورىن، پيجامالارىمىزدى  اۋىستىرىپ تۇردى. ارينە، مۇنىڭ بارلىعى الدىن-الا ۇيىمداستىرىلىپ، كەلىسىلگەن بولاتىن. بىزگە بارلىق قاجەتتىلىگىمىزدى قامتاماسىز ەتكەن قحر-نىڭ قىزمەتكەرلەرىنە العىسىمىزدى بىلدىرەمىز، – دەدى گۇلباقىت بولاتبەك قىزى.

ۋحاننان ەۆاكۋاسيالانعان ستۋدەنت داۋرەن ۋريشانوۆ قىتايداعى ىندەتكە بايلانىستى پىكىر ءبىلدىردى. 

– ينتەرنەتتە جىبەرىلگەن بەينەجازبالار ەسكى جانە ولار قالاداعى ماسەلەگە مۇلدەم بايلانىستى ەمەس. بىزگە الدىن-الا ەسكەرتۋ ايتىلدى. ياعني، ارنايى دارىگەردىڭ نۇسقاۋلارىن ورىنداپ، ماسكا كيۋ سىندى. سوندىقتان ەشقانداي قورقىنىش بولمادى. قالا سىرتىنا شىعۋعا رۇقسات بەرمەدى، سول ءۇشىن حالىقتىڭ كوپشىلىگى ۇيدە وتىرىپ، جاقىن ماڭداعى دۇكەندەردەن ازىق-تۇلىك ساتىپ الىپ وتىردى، – دەدى ول.