كەلىسىمشارت بويىنشا قىزمەت ەتىپ جۇرگەن كىشى سەرجانتتىڭ شىمكەنت ماڭىنداعى اسكەري بولىمنەن قارۋ-جاراق الىپ قاشقانى تۋرالى اقپارات الەۋمەتتىك جەلى مەن مەسسەندجەرلەردە تارالۋدا. بۇعان قاتىستى ق ر قورعانىس مينيسترلىگىنىڭ باسپا ءسوز قىزمەتى رەسمي مالىمدەمە جاسادى. 

"شىمكەنت ماڭىنداعى اۋە شابۋىلىنا قارسى قورعانىس اسكەري ءبولىمىنىڭ بىرىندە كەلىسىمشارت بويىنشا قىزمەت اتقارىپ جۇرگەن كىشى سەرجانت اۋىسىم كەزەكشىسى قۇرامىندا بولىپ، ءبولىمدى ءوز ەركىمەن تاستاپ كەتكەن. ءدال سول ۋاقىتتا قارۋدى ساقتاۋ بولمەسىندە اتىس قارۋىنىڭ بەلگىلى ءبىر سانىنىڭ جەتىسپەۋشىلىگى انىقتالدى. قۇقىق قورعاۋ ورگاندارى مەن اسكەري پوليسيا كۇشتەرى سارباز مەن جوعالعان قارۋدى ىزدەۋ، قاۋىپسىزدىكتى قامتاماسىز ەتۋ بويىنشا قاجەتتى ءىس-شارالاردى جۇرگىزۋدە"، – دەلىنگەن حابارلامادا.

الەۋمەتتىك جەلىلەردە تاراعان اقپاراتتا بالعىنباي ابىلاي اتتى اسكەري قىزمەتشىنىڭ ورداباسى اۋدانى بادام ستانساسىنداعى اسكەري بولىمنەن 30 دانا اك-74 اۆتوماتىن، 27 دانا پم تاپانشاسىن، 5،45 مم-لىك 400 دانا، 8 مم-لىك 24 دانا وق الىپ كەتكەنى حابارلانۋدا.