بىلتىر ىشكى ىستەر مينيسترلىگى قۇرىلىمىندا 95 باسشى سىبايلاس جەمقورلىق وقيعالارى ءۇشىن جۇمىستان بوساتىلىپ، 1283 باسشى تارتىپتىك جازاعا تارتىلعان. بۇل تۋرالى ىشكى قاۋىپسىزدىك دەپارتامەنتىنىڭ باستىعى ارمان سادانوۆ حابارلادى.

– سىبايلاس جەمقورلىققا قارسى ىشكى ىستەر ورگاندارىنىڭ اعا قىزمەتكەرلەرىنە قويىلاتىن تالاپتار كۇشەيتىلدى. تارتىپتىك جازا قولدانۋ الگوريتمى تەك كىنالى قىزمەتكەردىڭ عانا ەمەس، ونىڭ باسشىسىنىڭ دا جاۋاپكەرشىلىك دارەجەسىن انىقتاۋمەن بەكىتىلدى. 2019 جىلى بولعان توتەنشە جاعدايلار ءۇشىن 1283 باسشى تارتىپتىك جازاعا تارتىلىپ، ونىڭ 95ء-ى جۇمىستان بوساتىلدى، 242ء-ى قىزمەتىنەن كەتتى، – دەپ ايتتى سادانوۆ ءىىم وتكىزگەن بريفينگتە.

سونىمەن قاتار، ول ىشكى قاۋىپسىزدىك دەپارتامەنتىنىڭ باسىم باعىتتارىنىڭ ءبىرى ىشكى ىستەر ورگاندارىنىڭ قىزمەتكەرلەرىن قورعاۋ دەدى. وتكەن جىلى پوليسيا قىزمەتكەرلەرىنە قارسى كۇش قولدانعانى ءۇشىن 302 بەيبىت تۇرعىن سوتتالعان بولاتىن.

– 2019 جىلى ىشكى ىستەر ورگاندارىنىڭ قىزمەتكەرلەرىنە پارا بەرۋدىڭ 55 فاكتىسى توقتاتىلدى. جىل باسىنان بەرى مۇنداي 31 فاكت تىركەلگەن، – دەدى دەپارتامەنت باستىعى ارمان سادانوۆ.