بەلسەندى دۋلات ءاعادىل نۇر-سۇلتانتاعى تەرگەۋ يزولياتورىندا كوز جۇمدى. بۇل اقپاراتتى نۇر-سۇلتان قالالىق پولسيا دەپارتامەنتى حابارلادى.
"نۇر-سۇلتانداعى تەرگەۋ يزولياتورىنا جاقىندا جەتكىزىلگەن 1977 جىلى تۋعان دۋلات ءاعادىل قايتىس بولدى. دۋلات اعادىلگە سوتتى قۇرمەتتەمەۋ، سۋديانى، سوت وتىرىسىنا قاتىسۋشىلاردى قورلاۋ باپتارى بويىنشا قىلمىستىق قۇقىق بۇزۋشىلىقتار جاساعانى ءۇشىن قىلمىستىق ءىس قوزعالدى.
اعىمداعى جىلدىڭ قاڭتار ايىندا ول سىرتتاي ايىپتالۋشى بولىپ تانىلىپ، وعان قاتىستى ەشقايدا كەتپەۋ تۋرالى قولحات رەتىندە بۇلتارتپاۋ شاراسى تاڭدالدى. تەرگەۋگە كەلمەۋىنە جانە ودان جالتارۋىنا بايلانىستى سوت ونىڭ جازاسىن كۇزەتپەن ۇستاۋعا وزگەرتتى" دەلىنگەن دەپارتامەنت حابارلاماسىندا.
دەپارتامەتتىڭ مالىمەتىنشە، 24 اقپاندا شامامەن ساعات 21.00-دە دۋلات ءاعادىل ءوز ۇيىنەن تەرگەۋ يزولياتورىنا جەتكىزىلدى. ودان باسقا تەرگەۋ يزولياتورىنىڭ كامەراسىندا تاعى ءتورت ادام بولعان، ولار دۋلات اعادىلگە قاتىستى زورلىق-زومبىلىق جاساۋ فاكتىلەرى بولماعانىن راستاعان.
"مەديسينالىق كۋالاندىرۋدىڭ قورىتىندىسىنا سايكەس، ۇستالعان كەزدە ول ماس كۇيىندە بولعان. قايتىس بولعانىن جەدەل مەديسينالىق جاردەم بريگاداسى انىقتادى. الدىن الا بولجام بويىنشا ءولىمنىڭ سەبەبى: "جۇرەك قان تامىر جەتىسپەۋشىلىگى". قازا تاپقان ادامنىڭ دەنەسىندە قانداي دا ءبىر دەنە جاراقاتتارى جوق. سوتقا دەيىنگى تەرگەۋ باستالدى" دەپ مالىمدەدى نۇر-سۇلتان پوليسيا دەپارتامەنتى.
دۋلات ءاعادىل – الەۋمەتتىك پروبلەمالار جانە ازاماتتىق قۇقىقتى ساقتاۋ ماسەلەسىن كوتەرىپ جۇرگەن بەلسەندى. ول وتكەن جىلى بىرنەشە مارتە اكىمشىلىك جازاعا تارتىلىپ، كەمىندە 60 تاۋلىك قاماۋدا وتىرعان.
43 جاستاعى بەلسەندى قاراشانىڭ ورتاسىندا اكىمشىلىك قاماۋدا وتىرعان سەلينوگراد اۋداندىق تەرگەۋ يزولياتورىنان قاشىپ كەتكەن ەدى. كەيىن ول ارەكەتىنىڭ سەبەبىن "زاڭسىز قۋدالاۋعا قارسىلىعىم" دەپ تۇسىندىرگەن. پوليسيا ەكى كۇن بويى ىزدەگەن بەلسەندى 15 قاراشادا ءوزى باس پروكۋراتۋرا الدىنا كەلگەن. كەيىن ول "سوت قاۋلىسىن ورىنداماعانى ءۇشىن" تاعى 6 تاۋلىككە سوتتالعان ەدى.
پىكىر قالدىرۋ