قوستانايداعى «سارىارقا اۆتوپروم» زاۋىتى بيىل 50 اۆتوكولىكتى نارىققا شىعارماق. وسىلايشا ءوندىرىس اۋقىمى بىرنەشە ەسە كوبەيەدى، دەپ حابارلايدى قازاقپارات.

كاسىپورىندا بىلتىر 26 مىڭعا جۋىق كولىك قۇراستىرىلعان. بۇل 2018 جىلعى كورسەتكىشتەن ەكى ەسە كوپ. «سارىارقا اۆتوپروم» زاۋىتىنىڭ ديرەكتورى سىرىم سەمەيبايەۆتىڭ ايتۋىنشا، وتاندىق كولىكتەرگە دەگەن سۇرانىستىڭ ءوسۋى ەل ەكونوميكاسىن دامىتۋعا سەپتىگىن تيگىزەدى.

– قوستانايداعى زاۋىتتان الەمدىك برەند سانالاتىن كولىكتەردىڭ جەتى ءتۇرى شىعارىلادى. العاشقى اشىلعاندا تەك دايىن بولشەكتەر قۇراستىرىلاتىن. بۇگىندە جۇمىس دانەكەرلەۋ مەن سىرلاۋدان باستالادى. ياعني، ءونىمنىڭ وتاندىق ۇلەسى ارتقان. سونىمەن قاتار ءوندىرىس اۋقىمى دا ەسەلەپ وسۋدە. مىسالى بيىل جەلىدەن شىعاتىن كولىك سانىن 50 مىڭعا دەيىن جەتكىزۋ جوسپارلانىپ وتىر. ءوندىرىستىڭ ارتۋى تىكەلەي سۇرانىسقا بايلانىستى. ال سۇرانىستىڭ ءوسۋ سەبەبى مەملەكەتتىڭ وتاندىق كولىكتى ساتىپ الۋشىلارعا جەڭىلدەتىلگەن نەسيە بەرۋىندە. سەرۆيستىك قىزمەت جولعا قويىلعان. ءوندىرىس ارتقان سايىن ءونىمنىڭ وزىندىك قۇنى دا تومەندەي بەرەدى، – دەيدى زاۋىت باسشىسى.

داۋلەت نىسانبايەۆتىڭ وسى كاسىپورىندا جۇمىس ىستەگەنىنە 6 جىل. باستاپقىدا وزگە دە جەرگىلىكتى ماماندارمەن بىرگە قىتايداعى زاۋىتقا بارىپ تاجىريبە جيناپ قايتقان. ءقازىر كانىگى شەبەرلەردىڭ ءبىرى. ول باسقاراتىن دانەكەرلەۋ سەحىندا تاۋلىگىنە 16 كولىكتىڭ كابيناسى قۇراستىرىلادى.

– بىزدە جالپى ءوندىرىس بولىمىندە 1300 ادام ەڭبەك ەتەدى. زاۋىت ولارعا تەك جالاقى تولەۋمەن شەكتەلمەي الەۋمەتتىك جاعىنان دا جان-جاقتى قولداۋ كورسەتەدى. قالا بويىنشا تەگىن اۆتوبۋس جۇرەدى. اسحانادا تەگىن تۇسكى اس بەرىلەدى. كوپبالالى وتباسىلارعا مەكتەپكە قاجەتتىلىكتەرگە كومەكتەسەدى. جاڭا سپورت زالى سالىندى. تەننيستەن، فۋتبولدان تۋرنيرلەر وتەدى. بۇلاردىڭ ءبارى بىزگە جاقسى كومەك، – دەدى داۋلەت نىسانبايەۆ.

سونىمەن، وتاندىق كولىككە دەگەن سۇرانىس ىشكى، سىرتقى نارىقتا باسەكەلەستىككە توتەپ بەرىپ، اۆتوموبيل ءوندىرىسىنىڭ العا باسۋىنا مۇمكىندىك بەرىپ وتىر. ال ءوندىرىستىڭ دامۋى مىڭداعان جۇمىس ورىندارى اشىلىپ، الدىمەن ەلدىڭ الەۋمەتتىك احۋالىن تۇزەۋگە سەپ بولارى انىق. قازاقستان اۆتوبيزنەس قاۋىمداستىعىنىڭ باسپا ءسوز قىزمەتىنىڭ حابارلاۋىنشا، 2020 جىلدىڭ قاڭتارىنداعى جاعدايدا قازاقستاندا ءوندىرىس كولەمى وتكەن جىلعى كورسەتكىشپەن سالىستىرعاندا 81،9% ۇلعايىپ، قارجى تۇرىندەگى كورسەتكىشى 71%-عا، ياعني 35،845 ملن تەڭگەگە دەيىن وسكەن.

– وتكەن جىلى اۆتوموبيل وندىرۋشىلەر ءوندىرىستى ەكى ەسە ارتتىردى. سونىمەن بىرگە، جەڭىل اۆتوموبيل جاساۋ سالاسىنىڭ ەلىمىزدەگى ماشينا جاساۋ قۇرىلىمىنداعى ۇلەسى 38%-عا جوعارىلادى. ءبىز ءوسۋ كورسەتكىشى بيىل دا كۇتىلەدى. ءبىراق ونىڭ قالاي وسەتىنى الداعى ساتىلۋ نارىعىنا بايلانىستى ايقىندالادى، – دەيدى قازاقستان اۆتوبيزنەس قاۋىمداستىعىنىڭ ۆيسە-پرەزيدەنتى انار ماقاشيەۆا.