نۇر-سۇلتان قالاسىنىڭ ۋاقىتشا ۇستاۋ يزولياتورىندا كوز جۇمعان دۋلات ءاعادىلدىڭ دەنەسىندە زورلىق-زومبىلىق بەلگىلەرى انىقتالعان جوق. بۇل تۋرالى بۇگىن قالالىق پروكۋراتۋرادان ءمالىم ەتتى، دەپ حابارلايدى Qamshy.kz اقپارات اگەنتتىگى قازاقپارات دەرەگىنە سۇيەنىپ.
«25 اقپان كۇنى نۇر-سۇلتان قالاسىنىڭ پوليسيا دەپارتامەنتى ءاعادىلدىڭ كوز جۇمۋ جاعدايى بويىنشا سوتقا دەيىنگى تەرگەۋ امالدارىن باستادى. ءدال سول كۇنى بارلىق ءمان-جايدى زەرتتەۋدىڭ شىنايىلىعىن قامتاماسىز ەتۋ ماقساتىندا قىلمىستىق ءىس نۇر-سۇلتان قالالىق پروكۋراتۋراسىنىڭ ارنايى پروكۋرورلارىنىڭ وندىرىسىنە قابىلداندى»، - دەپ حابارلادى ەلوردا پروكۋراتۋراسى.
بەلگىلى بولعانداي، د.ءاعادىلدىڭ وتباسىنىڭ ادۆوكاتى بەرگەن ءوتىنىش بويىنشا 26 اقپان كۇنى وتباسى شاقىرعان جەكە سوت ساراپشىلارىنىڭ قاتىسۋىمەن مارقۇمنىڭ دەنەسىنە زەرتتەۋ جۇرگىزىلگەن.
«ونىڭ ناتيجەسى بويىنشا، جۇمىلدىرىلعان ماماندار ءاعادىلدىڭ ولىمىنە وتكىر جۇرەك-قان تامىر جەتكىلىكسىزدىگى سەبەپ بولعانىن انىقتادى. دەنەسىندە زورلىق-زومبىلىقتان بولاتىن قانداي دا ءبىر جاراقاتتار انىقتالمادى. ىسكە تارتىلعان ساراپشىلار، سونىمەن قاتار ونىڭ باۋىرى مەن ادۆوكاتى تاراپىنان ەسكەرتۋ نەمەسە ءوتىنىش بەرىلگەن جوق. سوت ساراپتاماسىنىڭ قورىتىندىسى لابوراتوريالىق زەرتتەۋ ناتيجەسى بويىنشا بەرىلەدى. سوتقا دەيىنگى تەرگەۋ امالدارى جالعاسۋدا»، - دەلىنگەن ۆەدومستۆو حابارلاماسىندا.
پىكىر قالدىرۋ