مينيسترلىكتەن 11 ملرد تەڭگە بولىنگەن "قاسىم حان" تۋرالى كوركەم ءفيلمنىڭ ءتۇسىرۋ جۇمىستارى توقتاپ تۇر. بۇنى باستاپقى سەناريي اۆتورى سماعۇل ەلۋباي راستادى، دەپ حابارلايدى Qamshy.kz اقپارات اگەنتتىگى Azattyq Rýhy دەرەگىن نەگىزگە الىپ.

وندا جازۋشى اۋەلى اتالعان فيلم تاعدىرىنىڭ قالاي شەشىلگەنىن ايتىپ بەرگەن: 

«فيلم توقتاتىلدى، كونسەرۆاسيادا تۇر. قارجىلىق ماسەلەلەرى تەكسەرىلىپ جاتىر. ارى قاراي نە بولاتىنىن بىلمەيمىن. وسى داۋدان سوڭ مينيسترمەن كەزدەسۋ بولدى. ءبىراق ول ودان دا جوعارى دەڭگەيدە شەشىلدى عوي. ول ۇلكەن كىسىلەرگە ايتىپ كورەيىن دەدى. ايتىلدى. سوسىن توقتاتىلدى. فيلم حالىققا كەرەك. مەن ءبىر جىلداي جۇمىس ىستەگەن سەناريي تۇر، دايىن. ءبىراق جوبا مۇلدەم جابىلعان جوق. ۋاقىتشا توقتاتىلىپ تۇر. مەنىڭ ويىمشا، ءبارى دۇرىس شەشىلەدى. سەبەبى قارجىسى بولىنگەن، جابىلماۋى كەرەك دەپ ويلايمىن. كونسەرۆاسيادان الىنۋىن كۇتىپ وتىرمىز»، - دەيدى سماعۇل ەلۋباي.

قالامگەر بۇدان بولەك مينيسترلىك وكىلدەرى بۇل ماسەلەگە قاتىستى الداعى كۇندەرى جاۋاپ بەرەتىنىن دە جەتكىزەدى. سونىمەن بىرگە، تاجىريبەلى تۇرىك رەجيسسەرىنىڭ كوپسەريالى كينو تۇسىرۋىنە نەگە قارسى بولعانىن اشىپ تۇسىندىرەدى.

«گيۋناي جوبا توقتاتىلعان سوڭ كەتىپ قالدى. مەن ونىمەن ءبىر-اق رەت، ەڭ العاش كەلگەن كەزدە كەزدەسىپ، تالقىلاۋدا  بىرگە بولعانبىز. ءبىراق كەيىن ءبىز ونىڭ كوپ سەريا تۇسىرۋىنە قارسى بولدىق قوي. ونىڭ سەبەبى 30-40 جىل قاسىم حان مەن مۇحامەد شايباني قازاق-وزبەك بولىپ سوعىسادى. مەن جازعان سەنارييدە بۇل جاعى جاسىرىن كورسەتىلگەن ەدى. ەندى الگى سەريالدا ونى جاسىرا المايتىنى بەلگىلى. ەكرانداعى توبەلەس ومىردەگى توبەلەسكە ۇلاسىپ كەتۋى مۇمكىن. توقاتۋ كەرەك دەپ قارسى بولعانىم سوندىقتان. ارالاسىپ وتىرعان دوس حالىقپەن سوعىستى ناسيحاتتاۋعا بولمايدى. ەگەر ءبىر سەرياسىن تۇسىرسەك، ءبىر-اق رەت سوعىس كورسەتىلەدى. نەگىزگى اكسەنت مۇحامەد ءشايبانيدىڭ ءوزى مەن قاسىم حانعا جاسالادى. قالعان جەرىندە سىلاپ-سيپاپ ءوتىپ كەتەمىز. ونىڭ اقىرىندا وزبەكتەر جەڭىلىپ كەتتى، سىعاناقتى تاستاپ، ولار بۇقارا، سامارقانعا اۋىپ كەتتى»، - دەيدى جازۋشى.

ەڭ قىزىعى، سماعۇل ەلۋباي ءبىر سەريالى پروكاتقا ارنالعان «قاسىم حان» تۋىندىسىنا مينيسترلىك بولگەن قارجىدان از اقشا كەتەدى دەپ ەسەپتەيدى. ونىڭ ايتۋىنشا، ءوزى ۇسىنعان جوباعا 2 ملن اقش دوللارى كولەمىندە قاراجات جەتكىلىكتى. 

ەسكە سالا كەتەيىك، سماعۇل  ەلۋباي «باتىر بايان» (1992)، «كەك» (2004)، «اڭشى بالا» (2012)، «الماس قىلىش» (2016)، «قازاق حاندىعى» تەلەسەريالى (2016)، «التىن تاق» (2019) سياقتى بىرنەشە تۋىندى سەنارييلەرىنىڭ اۆتورى.