قازاقستان پرەزيدەنتى قاسىم-جومارت توقايەۆ informburo.kz سايتىنا بەرگەن سۇحباتىندا 25 اقپان كۇنى نۇر-سۇلتانداعى تەرگەۋ اباقتىسىندا كوز جۇمعان قوعام بەلسەندىسى دۋلات ءاعادىلدىڭ ءولىمى تۋرالى ايتتى.
پرەزيدەنتتىڭ سوزىنشە، ءاعادىلlءدىڭ قازاسى تۋرالى رەسمي نۇسقاعا قارسى پىكىر ايتۋ – شىندىققا قارسى شىعۋمەن تەڭ.
– قوعامدا ۇلكەن رەزونانس تۋدىرعان ىسپەن مۇقيات تانىسىپ شىقتىم. وكىنىشكە قاراي، بەلسەندى ءاعادىل جۇرەك تالماسىنان قايتىس بولدى دەپ سەنىمدى تۇردە ايتا الامىن. ال بۇعان قارسى پىكىر ايتۋ – شىندىققا قارسى شىعۋ. مارقۇمنىڭ كوزقاراسى، ساياسي ۇستانىمى قانداي بولسا دا، ول ەڭ ءبىرىنشى – ادام. ادام ءومىرى بارىنەن دە بيىك ءارى قۇندى. ءبارىمىز جارتۋشىنىڭ قالاۋىنا بويۇسىنامىز. يماندى بولسىن!، – دەدى توقايەۆ.
دۋلات ءاعادىل 25 اقپاندا تەرگەۋ اباقتىسىندا كوز جۇمعان ەدى. ىشكى ىستەر مينيسترلىگى الدىن الا بولجام بويىنشا ءاعادىلدىڭ جۇرەك تالماسىنان قايتىس بولعانىن ايتتى. ءبىراق بەلسەندىنىڭ ولىمىنە بايلانىستى ءالى ناقتى ساراپتاما قورىتىندىسى دايىن بولعان جوق. ءاعادىلدىڭ جاقتاستارى مەن كەيبىر قۇقىق قورعاۋشىلار ونىڭ جۇرەك تالماسىنان قايتىس بولعانىنا سەنبەيدى. ولار ءاعادىل قازاسىن ونىڭ ساياسي بەلسەندىلىگىمەن بايلانىستىرىپ، ولىمىنە بيلىكتى كىنالاپ وتىر.
توقايەۆ قوعامدا ۇلكەن رەزونانس تۋدىرعان ءاعادىل ءولىمى تۋرالى العاش رەت ايتىپ وتىر. بۇعان دەيىن ەلدەگى ساياسي ۇيىمدار، قۇقىق قورعاۋشىلار جانە شەتەل ديپلوماتتارى قازاقستان بيلىگىن دۋلات ءاعادىلدىڭ ولىمىنە بايلانىستى تۇسىنىكتەمە بەرۋگە شاقىرعان بولاتىن.
پىكىر قالدىرۋ