الماتىداعى رەسپۋبليكا الاڭىندا پوليسيا "رۇحسات ەتىلمەگەن" ميتينگىگە شىققانداردى ۇستاپ جاتىر.

بۇگىن، ياعني 1 ناۋرىز كۇنى دەمپارتيا قۇرۋ بويىنشا ىنتالى توپ وكىلدەرى، رەسپۋبليكا، Oyan، Qazaqstan قوزعالىستارى، سونداي-اق قازاقستاندا "ەكسترەميستىك ۇيىم" دەپ تانىلعان "قازاقستاننىڭ دەموكراتيالىق تاڭداۋى" (قدت) قوزعالىسى  بەيبىت ميتينگىگە شاعىتىنىن حابارلاعان بولاتىن.

الماتىداعى رەسپۋبليكا الاڭىندا جۇرگەن قامشى ءتىلشىسى پوليسيا قىزمەتكەرلەرى مەن ارنايى جاساق وكىلدەرى الاڭدى تولىقتاي قورشاۋعا العانىن، قالالىق اكىمدىك ماڭىندا موبيلدىك ينتەرنەت مۇلدە ۇستاماي تۇرعانىن حابارلادى.

"رەسپۋبليكا" الاڭىندا پوليسيا ونداعان ادامدى ۇستادى. ۇستالعان بەلسەنبىلەردىڭ كەيبىرى "ويان، قازاقستان"، شال كەت" دەپ ۇرانداتىپ جاتىر. كەيبىر ازاماتتاردىڭ قولىندا تەرگەۋ يزولياتورىندا "جۇرەك تالماسىنان قايتىس بولدى" دەلىنگەن قوعام بەلسەندىسى دۋلات ءاعادىلدىڭ سۋرەتتەرى بولدى. 

پوليسيا ۇستاعانداردىڭ اراسىندا جۋرناليست، "دات" گازەتتەر جوباسىنىڭ جەتەكشىسى ەرمۇرات باپي دە بار.

نۇر-سۇلتان قالاسىنداعى ميتينگ وتەتىن جەر دەلىنگەن ورىندا دا ينتەرنەت ۇستاماي تۇرعانى بەلگىلى بولدى. رەسپۋبليكا قوزعالىسىنىڭ facebook-تاعى پاراقشاسىندا الاڭدا بايلانىس بۇعاتتالۋىنا بايلانىستى حابار تاراتۋ مۇمكىندىگى شەكتەۋلى ەكەنى حابارلاندى. ارتىنشا، بەلسەندىلەر بەللا ورىنبەتوۆا، ايسۇلتان جاقىپوۆ، مۇراتبەك قايىرجانۇلىن پوليسيا ۇستاپ الىپ كەتكەنىن مالىمدەدى.

سونىمەن قاتار Oyan، Qazaqstan قوزعالىسىنىڭ facebook پاراقشاسىندا بىرنەشە بەلسەندىنىڭ ۇستالعانى تۋرالى اقپارات شىقتى. ولاردىڭ قاتارىندا باۋىرجان ءسابيتوۆ، جانەل شاحانوۆا، ولجاس شاحانوۆ، اسەم جاپىشيەۆا، ءدىلدا رامازان، ايزات ابىلسەيت، تامينا وسپانوۆا، دارحان ءشارىپوۆ، ازيزا ەسماعامبەتوۆا، دانا ءشارىپوۆا، ەربولات ايعاق، اينا ساماتوۆا، مارجان ءۋاليحان، ديانا دۇيسەمبايەۆا، سىمبات ومارقۇلوۆا، دينا باقرايەۆا، ەلميرا قويشىبەكوۆا، اناستاسيا فيليپپوۆا سىندى ازاماتتار بار.

بۇعان دەيىن ميتينگىگە شىقپاق بولعان دەمپارتيا ىنتالى توبىنىڭ جەتەكشىسى مەن ونىڭ جاقتاستارىنا شابۋىل جاسالعانى حابارلانعان بولاتىن. شابۋىل سالدارىنان جانبولات مامايدىڭ زايىبى ينگا يمانباي اۋرۋحاناعا ءتۇستى.