قازاقستان پرەزيدەنتى قاسىم-جومارت توقايەۆ 1 ناۋرىزدا جامبىل وبلىسى قورداي اۋدانىنا جۇمىس ساپارىمەن بارىپ، اقپاندا ەتنيكالىق قازاقتار مەن دۇنگەندەر اراسىندا جانجال بولعان اۋىلداردىڭ ءبىرى – قاراكەمەر (كىلەڭ قازاقتار تۇراتىن اۋىل) اۋىلىنىڭ تۇرعىندارىمەن كەزدەستى. توقايەۆتىڭ ساپارى تۋرالى اقوردا سايتى جازدى. 

اقوردانىڭ جازۋىنشا، كەزدەسۋ بارىسىندا پرەزيدەنت تۇرعىندار اراسىندا بولعان جانجال "مەملەكەتكە نۇقسان، ەل ابىرويىنا زيان كەلتىرگەنىن" ايتىپ، "كەلەشەكتە مۇنداي قاسىرەتتى بولدىرماۋ ءۇشىن ءتيىستى شارا قولدانۋىمىز قاجەت" دەپ اتاپ ءوتتى. 

كەزدەسۋ كەزىندە توقايەۆ جانجالدان سوڭ جامبىل وبلىسىنىڭ باسشىلىعى نە سەبەپتى اۋىستىرىلعانىن تۇسىندىرگەن. 

"قاقتىعىس بولعان جەردە ەشقاشان، ەشقانداي دامۋ بولمايدى. بۇل – زاڭدىلىق. وكىنىشكە قاراي، وبلىس باسشىلارى بۇل زاڭدىلىقتى دۇرىس تۇسىنگەن جوق. سوندىقتان وبلىس باسشىلارى، سونىڭ ىشىندە قۇقىق قورعاۋ ورگاندارىنىڭ باسشىلارى تولىعىمەن اۋىستىرىلدى، قىزمەتكەرلەر جۇمىستان بوساتىلدى. جاڭا باسشىلار تاعايىندالدى. سولاردىڭ اراسىندا بەردىبەك ساپاربايەۆ بار. بۇل ازاماتتى جاقسى تانيسىزدار. تاجىريبەسى مول مەملەكەتتىك قىزمەتشى. ونىڭ الدىندا تۇرعان ماقسات – تۇراقسىزدىققا تۇرتكى بولاتىن جاعدايلاردى تۇبەگەيلى جويۋ جانە ءوڭىردىڭ دامۋىنا سەرپىن بەرۋ" دەدى ول تۇرعىندارمەن كەزدەسۋدە.

"اۋداندا ءبىر توپ ادام بەلسەندى تۇردە كونتراباندامەن اينالىسىپ جۇرگەن. بۇل – بەلگىلى نارسە. وسى ىسكە باسقا توپ تا قاتىسقىسى كەلگەن. ءبىر سوزبەن ايتساق، زاڭسىز تابىس كوزى ءۇشىن ەكى قىلمىستىق توپتىڭ اراسىندا تەكەتىرەس پايدا بولعان. بۇل تەكەتىرەس سالدارىنان كوپ ادام زارداپ شەكتى. 11 ادام قازا تاپتى. ونى اشىق ايتۋ كەرەك. ەندى قۇقىق قورعاۋ ورگاندارىنىڭ الدىندا تۇرعان ماقسات – بارلىق قىلمىسكەرلەردى ۇلتىنا قاراماي، زاڭعا سايكەس جازاعا تارتۋ. ونسىز ەلىمىزدە ءتارتىپ بولمايدى"  دەدى پرەزيدەنت.

توقايەۆ جيىندا سويلەگەن سوزىندە "اشىق ايتۋ كەرەك" دەپ  ايتقانىمەن، 11 ادامنىڭ ولىمىنە سەبەپ بولعان "جانجالداسقان ەكى كونتراباندالىق توپتى" ناقتى اتامادى. 

اقپاننىڭ جەتىسىنەن سەگىزىنە قاراعان ءتۇنى جامبىل وبلىسى قورداي اۋدانىنداعى بىرنەشە اۋىلدا قازاقتار مەن دۇنگەندەر جانجال بولىپ، رەسمي اقپارات بويىنشا، 11 ادام قازا تاۋىپ، 180-نەن اسا ادام زارداپ شەككەن. ماسانچي، سورتوبە، بۇلار باتىر، اۋقاتتى اۋىلدارىندا رەسمي مالىمەت بويىنشا، 20 ساۋدا ورنى مەن 39 ءۇي ءبۇلىنىپ، 47 كولىك ورتەنگەن.

رەسمي مالىمەت بويىنشا، تۇرعىندار اراسىنداعى جانجال ەتنيكالىق دۇنگەندەردىڭ قازاق قاريا مەن ونىڭ ەكى ۇلىن ۇرىپ-سوعۋىنان كەيىن باستالعان.