وڭتۇستىك كورەياداعى سينچونجي ءدىني سەكتاسىنىڭ جەتەكشىسى سينچەندجي لي مان حي كوپشىلىك الدىندا تىزە بۇگىپ، كوروناۆيرۋستىڭ تارالعانى ءۇشىن كەشىرىم سۇرادى. بۇل تۋرالى rappler.com حابارلادى. 

وڭتۇستىك كورەيا بيلىگىنىڭ پىكىرىنشە، بۇل ەلدىڭ ورتالىعىنداعى كوروناۆيرۋستىڭ نەگىزگى تاسىمالداۋشىلارى سينچونجي سەكتاسىن ۇستانۋشىلار. 10 اقپاندا شىركەۋدىڭ 61 جاستاعى قىزمەتكەرى كوروناۆيرۋستان زارداپ شەككەن. بۇدان بۇرىن ول 4 شىركەۋ قىزمەتىندە بولعان.

وسىلايشا، وڭتۇستىك كورەياداعى اۋقىمى بويىنشا 4ء-شى ورىنداعى، 2،5 ملن تۇرعىنى بار تەگۋ قالاسىنداعى سينچحودجي ءدىني سەكتاسى ەپيدەميا وشاعىنا اينالىپ وتىر. بۇگىنگى تاڭدا بۇكىل ەل بويىنشا تىركەلگەن COVID-19 ۆيرۋسىنىڭ 4000-عا جۋىعى وسى سەكتامەن بايلانىستىرىلىپ وتىر.

– مەن شىركەۋدىڭ بارلىق مۇشەلەرى اتىنان ادامداردان كەشىرىم سۇرايمىن. بۇل بايقاۋسىزدا ورىن الدى. ءبىز قولىمىزدان كەلگەننىڭ ءبارىن جاسادىق، ءبىراق ەپيدەميانى توقتاتا المادىق. مەن ادامدار مەن ۇكىمەتتەن كەشىرىم سۇرايمىن، – دەدى 88 جاستاعى سەكتانىڭ جەتەكشىسى لي مان حي. 

سەۋل قالالىق ۇكىمەتىنىڭ پروكۋرورلارى لي مان حيگە جانە باسقا دا 11 سەكتانىڭ جەتەكشىلەرىن جاۋاپقا تارتىلۋىن سۇرادى. كەيبىر مالىمەتتەرگە سۇيەنسەك، سەكتاداعى ناۋقاستار مەديسينالىق مەكەمەلەردەگى قىزمەتتەن باس تارتقان، ولاردىڭ تۋىستارى مەن دوستارى دارىگەرلەردى ۇيگە كىرگىزبەگەن.