ناۋرىزدىڭ 3ء-ى كۇنى قازاقستان پرەزيدەنتى قاسىم-جومارت توقايەۆ نۇر-سۇلتاندا جۇڭگو كومپارتياسى ساياسي بيۋروسىنىڭ مۇشەسى يان سزەچيمەن كەزدەستى. بۇل تۋرالى اقوردا سايتى حابارلادى. 

اقوردانىڭ جازۋىنشا، يان سزەچي توقايەۆقا جۇڭگو باسشىلىعىنىڭ كوروناۆيرۋسپەن كۇرەسكە قارسى شارالارى تۋرالى باياندادى. ال توقايەۆ قىتايدىڭ كوروناۆيرۋسپەن كۇرەستە اتقارىپ جاتقان جۇمىستارىن جوعارى باعالاپ، قازاقستان كوروناۆيرۋسپەن بىرلەسىپ كۇرەسۋگە نيەتتى ەكەنىن ايتتى.

– وسىنداي قيىن ساتتە قازاقستان جۇڭگو باسشىلىعىنىڭ ناقتى ءارى تاباندى ىس-ارەكەتتەرىنە جان-جاقتى قولداۋ بىلدىرەدى. ءتوراعا سي ءسزينپيننىڭ ءوزى ايتقانداي، بۇل جۇڭگو حالقىنىڭ سوڭعى جىلدارى باستان كەشىپ وتىرعان ەڭ قيىن كەزەڭى. ءومىردىڭ ءارتۇرلى كەزەڭدەرىندە كەزدەسەتىن وسىنداي اۋىرتپالىقتارمەن بىرلەسىپ كۇرەسەمىز دەپ ويلايمىن. ەكى مەملەكەت اراسىنداعى ستراتەگيالىق سەرىكتەستىكتى دامىتۋ جانە نىعايتۋ جولىندا العا قادام باسا بەرەمىز، – دەدى پرەزيدەنت.

اقوردانىڭ حابارلاماسىنا قارعاندا، كەزدەسۋ بارىسىندا قازاق-قىتاي بايلانىستارىن نىعايتۋدىڭ پەرسپەكتيۆالارى، سونداي-اق، ەكى ەلدىڭ حالىقارالىق ارەناداعى ىقپالداستىعى تالقىلاندى.

– قحر ءتوراعاسى سي ءسزينپيننىڭ سالەمىن جەتكىزۋگە رۇقسات ەتىڭىز. ءسىز بىلتىر قىركۇيەك ايىندا قىتايعا العاش رەت مەملەكەتتىك ساپارمەن باردىڭىز. سول كەزدە قحر توراعاسىمەن بىرلەسىپ جان-جاقتى ستراتەگيالىق سەرىكتەستىكتى ودان ءارى دامىتۋ تۋرالى مالىمدەمە جاساپ، قىتاي-قازاق قاتىناستارىنا تىڭ سەرپىن بەردىڭىزدەر، – دەدى يان سزەچي.