قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ "وڭتۇستىك كورەياداعى قازاقستان ازاماتىنان كوروناۆيرۋس انىقتالدى" دەگەن اقپاراتتىڭ جالعان بولىپ شىققانىن ايتتى. 

ونىڭ سوزىنشە، وڭتۇستىك كورەيانىڭ الەۋمەتتىك جەلىلەرىندە تاراعان ول اقپاراتتى كورەياداعى قازاقستان ەلشىلىگى تەكسەرىپ، جوققا شىعارعان. 

"2020 جىلدىڭ 3 ناۋرىزىندا وڭتۇستىك كورەيانىڭ الەۋمەتتىك جەلىلەرىنىڭ ورىس ءتىلدى توپتارىندا "وڭتۇستىك كورەيادا زاڭسىز جۇرگەن قازاقستان ازاماتىنىڭ كوروناۆيرۋسكە شالدىققانى راستالدى" دەگەن اقپارات تارادى. اتالعان الەۋمەتتىك جەلىلەردىڭ حابارلاۋىنشا، قازاقستان ازاماتى كلينيكادان قاشىپ كەتىپ، ونى قازىرگى ۋاقىتتا پوليسيا ىزدەستىرۋدە. مۇنداي اقپارات "حابار 24" تەلەارناسىندا دا حابارلانعان. قازاقستاننىڭ وڭتۇستىك كورەياداعى ەلشىلىگى ءتيىستى شارالار جۇرگىزىپ، ونىڭ ناتيجەسىندە بۇل اقپارات راستالمادى. جەرگىلىكتى پوليسيامەن جانە ءبىزدىڭ ازاماتپەن بايلانىس ورناتىلعان. ول بۇعان دەيىن كلينيكاعا بارماعىنىن جانە كوروناۆيرۋس بار-جوعىن انىقتايتىن قاندايدا ءبىر ساراپتاما تاپسىرماعانىن جەتكىزدى" دەدى ۆەدومستۆو وكىلى.

ونىڭ ايتۋىنشا، كورەي پوليسياسىنىڭ اقپاراتىنا سايكەس، وسىدان بىرنەشە كۇن بۇرىن قازاقستاندىق ازامات كوروناۆيرۋسكە شالدىققان ادام بارعان قوعامدىق تاماقتانۋ ورنىندا بولعان.

"وسىعان بايلانىستى بەلگىلەنگەن تارتىپكە سايكەس، وعان جانە سول ۋاقىتتا اتالعان ورىندا بولعان بارلىق ادامدارعا ەگەر اۋرۋدىڭ سىرتقى بەلگىلەرى بايقالعان جاعدايدا ۆيرۋستىڭ بار-جوعىن انىقتاۋ تەستىن تاپسىرۋ قاجەت. وتانداسىمىز بارلىق قاجەتتى مەديسينالىق پروسەدۋرالاردان وتۋگە جانە جەرگىلىكتى بيلىكپەن ىنتىماقتاسۋعا دايىن. ءبىزدىڭ ەلشىلىك كوروناۆيرۋس وڭتۇستىك كورەيا اۋماعىندا انىقتالعان العاشقى كۇننەن باستاپ جەرگىلىكتى ىشكى ىستەر مينيسترلىگىمەن جانە اۋرۋلاردى باقىلاۋ، الدىن الۋ جونىندەگى كورەي ورتالىعىمەن تىعىز جۇمىس ىستەپ كەلەدى. اتالعان ورتالىقتىڭ ۇسىنىسى بويىنشا ءبىزدىڭ وتانداسىمىز تەلەفون ارقىلى كۇندەلىكتى دەنساۋلىعىنا باقىلاۋ جۇرگىزىپ، ءۇي كارانتينىندە بولۋى قاجەت. بۇل ۇسىنىس اۋرۋدىڭ سىرتقى بەلگىلەرى جوقتىعىنا نەگىزدەلگەن جانە ونى ەمدەۋگە جاتقىزۋدان جانە كوروناۆيرۋستىڭ بولۋىن تەستىلەۋدەن باس تارتىلدى" دەدى سمادياروۆ.

رەسمي وكىلدىڭ سوزىنشە، قازاقستاننىڭ وڭتۇستىك كورەياداعى ەلشىلىگى بۇل ماسەلەنى تۇراقتى باقىلاۋعا العان.

"جوعارىدا باياندالعانعا بايلانىستى ق ر سىرتقى ىستەر مينيسترلىگى ب ا ق وكىلدەرىنە تەكسەرىلمەگەن اقپاراتتى جاريالاپ، دۇرلىكتىرمەۋدى جانە ۇرەي تۋدىرماۋدى سۇرايدى. سىرتقى ساياسي ۆەدومستۆونىڭ رەسمي تۇسىنىكتەمەسىن كۇتۋ قاجەت. سونىمەن قاتار قازاقستان ازاماتتارىنداعى كوروناۆيرۋسكە قاتىستى اقپاراتتار الۋ ءۇشىن ق ر دەنساۋلىق ساقتاۋ مينيسترلىگىنە حابارلاسۋدى سۇرايمىز. ال سىرتقى ىستەر مينيسترلىگى شەت ەلدەردەگى ءبىزدىڭ وتانداستارىمىزعا قاتىستى اقپاراتتى تەكسەرىپ، ناقتى مالىمەت بەرۋگە تىرىسادى" دەدى ول.

كەشە كەشكە قاراي قازاقستانداعى مەملەكەتتىك تەلەارنالاردىڭ ءبىرى – "حابار 24" وڭتۇستىك كورەيادا قازاقستان ازاماتىنان كوروناۆيرۋس بەلگىلەرى انىقتالعانىن حابارلاعان.

كوپ ۇزاماي بۇل اقپارات ارنانىڭ سايتىنان ءوشىرىلدى. 

وڭتۇستىك كورەيا كوروناۆيرۋس جۇقتىرعاندار سانى كوبەيىپ بارا جاتقان يران، يتاليا سياقتى مەملەكەتتەر قاتارىندا. سوڭعى اقپاراتقا سايكەس، وڭتۇستىك كورەيا – كوروناۆيرۋس جۇقتىرعاندار سانى بويىنشا قىتايدان كەيىنگى ەكىنشى ەل. 

سىرتقى ىستەر مينيسترلىگىنىڭ دەرەگىنشە، وڭتۇستىك كورەيادا 35 مىڭ قازاقستان ازاماتى بار. ولاردىڭ 12 مىڭى زاڭسىز جۇرگەندەر. بۇعان دەيىن ۆەدومستۆو قازاقستان قاجەت بولعان جاعدايدا عانا كورەيادان ءوز ازاماتتارىن ەۆاكۋاسيالايتىنىن مالىمدەگەن.