اقش بيلىگى حالىقارالىق "باتىر ايەلدەر" سىيلىعىن يەلەنگەندەردىڭ ءتىزىمىن جاريالادى. سىيلىقتى يەگەرلەرىنىڭ قاتارىندا ەتنيكالىق قازاق سايراگۇل ساۋىتباي دا بار.
"سايراگۇل ساۋىتباي قىتايداعى ىلە قازاق اۆتونومياسىندا دۇنيەگە كەلگەن. كەيىن مەديسينالىق ۋنيۆەرسيتەتتى اياقتاعان سوڭ دارىگەر، ءمۇعالىم، ءبىلىم بەرۋ سالاسىندا ديرەكتور بولىپ قىزمەت اتقارعان. 2016 جىلى سايراگۇل ساۋىتباي وتباسىمەن بىرگە قازاقستانعا كوشكىسى كەلەدى. ءبىراق قىتايدىڭ كوممۋنيستىك پارتياسى سايراگۇل ساۋىتبايدىڭ قۇجاتتارىن تارتىپ الىپ، ءوزىن قازاقستانعا جىبەرمەي قويعان. 2017 جىلعى قاراشادان 2018 جىلعى ناۋرىزعا دەيىن سايراگۇل ساۋىتباي لاگەردە تۇتقىندالعان ەتنيكالىق ۇلتتارعا جۇڭگو ءتىلىن ۇيرەتۋگە ءماجبۇر بولدى. 2018 جىلدىڭ ناۋرىز ايىندا سايراگۇل ساۋىتباي قازاقستانعا قاشىپ كەتەدى. كەيىن ول قىتايدىڭ مۇسىلماندارعا جاساعان رەپرەسسياسىنىڭ قۇربانى بولعانىن مالىمدەيدى. ول قىتايدىڭ مۇسىلماندارعا قىسىم جاساعانىن العاشقىلاردىڭ ءبىرى بولىپ دالەلدەيدى. سايراگۇل ساۋىتباي قازاقستاننان بوسقىن مارتەبەسىن الا الماعان سوڭ، بىلتىر 3 ماۋسىمدا وتباسىمەن بىرگە شۆەسياعا كەتكەن" دەپ جازىلعان شەتەلدىك باسىلىمدا.
پىكىر قالدىرۋ