مەديسينالىق ماسكانى تاعۋ اۋرۋعا شالدىققان ادام مەن دارىگەرگە عانا كەرەك. بۇل تۋرالى كوروناۆيرۋستىق ينفەكسيانىڭ اكەلىنۋى مەن تارالۋىنىڭ الدىن الۋ ماقساتىندا وتكەن بريفينگتە ايتىلدى، دەپ حابارلايدى قازاقپارات.

– ددسۇ جانە كوروناۆيرۋس بويىنشا جۇمىس ىستەيتىن ۇيىمدار بۇل دەرتەن قورعانۋدىڭ ەڭ باستى امالى ماسكا تاعۋ ەمەس ەكەنىن ايتادى. سەبەبى بۇل اۋادا ۇشىپ جۇعاتىن اۋرۋ ەمەس. ەڭ باستىسى – جەكە باس گيگيەناسىن دۇرىس ساقتاۋ كەرەك، – دەيدى بالالار جۇقپالى اۋرۋلار كافەدراسىنىڭ مەڭگەرۋشىسى، پروفەسسور ديناگۇل باەشوۆا.

ونىڭ ايتۋىنشا، مەديسينالىق ماسكا اۋرۋ ادام تۇشكىرگەن كەزدە سىلەكەيىن شاشپاۋى ءۇشىن جانە ناۋقاستارمەن جۇمىس ىستەيتىن مەديسينالىق قىزمەتكەرلەرگە كەرەك.

– بۇل جاعدايدا قاسىڭدا تۇرعان ادامنان ءوزىڭدى كەم دەگەندە ەكى مەتر الىس ۇستاۋىڭ كەرەك. ەگەر اۋىرعان ادامعا وتە جاقىن تۇرساڭىز، ءسىزدى مەديسينالىق ماسكا قۇتقارمايدى. ونى كوروناۆيرۋس ينفەكسياسىن الدىن الۋ ءۇشىن قولدانۋعا بولادى. وڭتۇستىك كورەيادا دۇكەندە كەزەكتە تۇرعان ادامدار مەديسينالىق ماسكا تاققانىمەن، بىر-بىرىنە وتە جاقىن ورنالاسقان. وزدەرىڭىز كورىپ وتىرعانداي، سونىڭ سالدارىنان اۋىرعاندار سانى كۇرت ءوسىپ كەلەدى. ۆيرۋس جاقىن بايلانىس بولعان كەزدە جۇعاجى. جاساندى دۇرلىگۋ جاعدايىن تۋدىرۋدىڭ قاجەتى جوق، – دەيدى ول.

سونداي-اق، پروفەسسور كوروناۆيرۋستان ساقتانۋ جولدارىن ايتتى.

– كوروناۆيرۋس 60-70 ىستىق تەمپەراتۋرا جاعدايىندا بىردەن ءولىپ قالادى، سول سەبەپتى شيكى ازىق-تۇلىك تۇتىنباڭىزدار. الدىمەن ىستىق سۋمەن جۋىپ الۋ كەرەك. قولدى ءجيى جۋۋ قاجەت، – دەيدى ول.