دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋسقا بايلانىستى مەرەكەلىك جانە قوعامدىق ءىس-شارالاردىڭ توقتاتىلۋىنا قاتىستى پىكىر ءبىلدىردى. بۇل تۋرالى تengrinews.kz حابارلادى.

– بىزدە كوروناۆيرۋس انىقتالعان جوق، ۆيرۋس جۇقتىردى دەگەن كۇدىكپەن كەلەتىن ناۋقاستاردى تەكسەرىپ جاتىرمىز. سوندىقتان دا ءىس-شارالارعا شەكتەۋ قويۋدىڭ قاجەتى جوق. كوروناۆيرۋس انىقتالعان جاعدايدا - 1 نەمەسە ەكى ادامدا انىقتالعان جاعدايدا عانا وسىنداي شارالار قولدانامىز. حالىق دۇرلىكپەۋى ءۇشىن قوعامدىق ءىس-شارالاردى توقتاتۋ كەرەك بولاتىن شىعار. ءبىراق ءقازىر ولاي ىستەۋدىڭ قاجەتى جوق. قانداي دا ءبىر ءقاۋىپ بولسا باس سانيتار دارىگەر مەن ءار ءوڭىردىڭ باسشىلىعى قاجەت شەشىم قابىلدايدى، – دەدى مينيستر.

ءبىرتانوۆتىڭ ايتۋىنشا، ءدال ءقازىر بالاباقشا مەن قوعامدىق جەرلەرگە بارۋ ءقاۋىپتى ەمەس.

– مەنىڭ دە بالالارىم مەكتەپكە بارىپ ءجۇر، ەشقانداي ءقاۋىپ جوق. ءبىراق تۇماۋ ماۋسىمى ءجۇرىپ جاتقاندىقتان ءبىز كۇز جانە قىس ايلارىندا قوعامدىق ءىس-شارالاردى كوپتەپ ۇيىمداستىرماۋعا كەڭەس بەرەمىز. ءبىز مۇنى ۇنەمى ايتاتىنبىز. تاعى دا ايتامىن، قازاقستاندا كوروناۆيرۋس انىقتالسا، بىردەن سول مەزەتتە قاجەتتى شەشىمدەر قابىلدانادى، – دەدى مينيستر ءبىرتانوۆ.