"ەپيدەميالىق جاعداي بويىنشا بۇل بولجام قيسىنعا كەلمەيدى. سۇحبات بەرگەن ماماننىڭ ءوزى ينتەرۆيۋدىڭ تەلەفونمەن جۇرگىزىلگەنىن، سۇراقتى جاڭساق تۇسىنگەنىن مويىندادى. سوندىقتان، وسىنداي بولجام ايتقان. شىن مانىندە، ءبىز دە بولجامدار جاساپ وتىرمىز. ءبىراق ساۋىردە نەمەسە مامىر ايىندا دەپ ناقتى ەشتەڭە ايتا المايمىز"، – دەيدى ل. بيۋرابەكوۆا. 

وسىلايشا، اتالعان كوميتەت ءتوراعاسى كوروناۆيرۋستىڭ ناقتى جويىلۋ ۋاقىتىن ايتا الماعانىمەن، وزدەرى تاراپىنان دا بولجامدار جاسالىپ جاتقانىن جاسىرىپ قالا المادى.

ال قوعامدا كۇن رايىنىڭ جىلىنۋىنا بايلانىستى جۇقپالى ۆيرۋس ءورشىپ كەتپەي مە دەگەن الاڭ دا جوق ەمەس. وعان سەبەپ، وتكىر دەرتتىڭ كوبىنە جىلى جاقتاردا كوبىرەك ءورشىپ بارا جاتقانى بولىپ وتىر. ازىرگە بۇل ماسەلە توڭىرەگىندە ناقتى مالىمدەمە جاسالعان جوق.

ەسكە سالا كەتەيىك، قازىرگى ۋاقىتتا الەمدە COVID-19 ۆيرۋسىن جۇقتىرعاندار سانى 90 893 ادامعا جەتىپ، ودان 3110 ادام قايتىس بولعان.