بۇگىن الماتى قالاسىندا 10-عا جۋىق بەلسەندى "نۇر وتان" پارتياسىنىڭ فيليالىنا بارىپ، پارتيا وكىلدەرىنىڭ جەمقورلىقپەن ايىپتالعانىن ءتۇسىندىرۋدى تالاپ ەتتى. بۇل تۋرالى ازاتتىق حابارلادى.  قاڭتار جانە اقپان ايىندا "نۇر وتان" پارتياسىنىڭ 2 وكىلى پارا الۋ بويىنشا ايىپتالعانى انىقتالعان بولاتىن. 

جينالعان توپ ناۋرىز ايىندا وتستاۆكاعا كەتكەن ەكس-پرەزيدەنتتىڭ "نۇر وتان" پارتياسىن باسقارىپ وتىرعانىنا نارازىلىعىن ءبىلدىردى. ولار نازاربايەۆتىڭ وتستاۆكاعا كەتۋىن تالاپ ەتتى. پارتيا فيليالىنىڭ الدىنا جينالعان بەلسەندىلەردىڭ قولىندا "Stop Nazarbayev system" (نازاربايەۆ جۇيەسى توقتاسىن – رەد.) دەپ جازىلعان پلاكات بولعان.

بەلسەندىلەرمەن "نۇر وتان" پارتياسى الماتى بولىمشەسى ءتوراعاسىنىڭ ءبىرىنشى ورىنباسارى ستانيسلاۆ كانكۋروۆ سويلەستى. كانكۋروۆ 2019 جىلى جەمقورلىق بويىنشا مىڭنان استام ادامنىڭ جاۋاپقا تارتىلعانىن مالىمدەدى. سونداي-اق جاۋاپقا تارتىلعانداردىڭ 10 پايىزعا جۋىعى "نۇر وتان" پارتياسىنىڭ مۇشەسى ەكەنىن ايتتى. 

– ءيا، پارتيا وكىلدەرىنىڭ جەمقورلىقپەن ايىپتالعانى راس. دەگەنمەن، پارتيا باسشىسىنىڭ تاپسىرماسىمەن، قاتارىمىزدى پارا الۋشىلاردان "تازارتاتىن" بولامىز، - دەدى ستانيسلاۆ كانكۋروۆ. 

كەزدەسۋ بەلسەندى يلياشيەۆ قولىنداعى "Stop Nazarbayev system" دەپ جازىلعان پلاكاتىن اشىپ كورسەتكەننەن كەيىن اياقتالدى. ال ستانيسلاۆ كانكۋروۆ پلاكاتتى بۇكتەپ بەلسەندىگە قايتارىپ بەرىپ، كەزدەسۋدى توقتاتاتىنىن ايتتى. 

"كانكۋروۆ جۇمىستارى بار ەكەنىن ايتىپ، ءبىزدىڭ سۇراقتارىمىزعا تولىق جاۋاپ بەرمەدى. ءبىز سۇراق قويۋدى جالعاستىراتىن بولامىز" دەدى يلياشيەۆ. كەيىن بەلسەندىلەر "نازاربايەۆ، كەت" دەپ ايعايلادى. 

ەسكە سالساق، بۇگىن "نۇر وتاننىڭ" ساياسي كەڭەسى بيۋروسىنىڭ وتىرىسى جابىق تۇردە وتەتىنى حابارلاندى.