الەمدە مۇناي باعاسى تومەندەپ، دوللار باعاسىنىڭ وسۋىنە بايلانىستى  قازاقستان پرەزيدەنتى قاسىم-جومارت توقايەۆ ۇكىمەت مۇشەلەرى جانە ۇلتتىق بانك توراعاسىمەن كەڭەس وتكىزدى.  اقوردانىڭ حابارلاۋىنشا، جيىندا الەمدەگى ەكونوميكالىق جاعداي جانە ونىڭ قازاقستان ەكونوميكاسىنا اسەرىن تالقىلاندى.

ۇكىمەت پەن ۇلتتىق بانككە تاپسىرما بەرگەن توقايەۆتىڭ پرەمەر-مينيستر اسقار ءماميننىڭ باسشىلىعىمەن شۇعىل ارەكەت ەتۋ شتابى قۇردى. اقوردانىڭ جازۋىنشا، داعدارىسقا قارسى ءىس-قيمىلدار جوسپارى ازىرلەنىپ، ءىرى كاسىپورىنداردا حالىقتى جۇمىسپەن قامتۋعا قولداۋ كورسەتۋ جونىندە ارنايى جوسپار دايىندالماق. 

"ۇكىمەت 2020-2022 جىلدارعا ارنالعان رەسپۋبليكالىق بيۋدجەتتى ناقتىلاۋ جونىندە ۇسىنىس ەنگىزەدى. مەملەكەت باسشىسى بيۋدجەت شىعىندارىن قىسقارتۋ، وڭىرلەردە حالىقتى جۇمىسپەن قامتاماسىز ەتۋ، ەلىمىزدىڭ قارجى-ۆاليۋتالىق نارىعىن تۇراقتاندىرۋ، رەسپۋبليكالىق جانە جەرگىلىكتى   بيۋدجەتتەردى وڭتايلاندىرۋ بويىنشا شارالار قابىلداۋ قاجەتتىگىن ايتتى" دەلىنگەن اقوردا حابارلاماسىندا. 

وتكەن اپتانىڭ سوڭىندا ۆەنادا وپەك، ساۋد ارابياسى جانە رەسەي مۇناي باعاسىن ۇستاپ تۇرۋ ءۇشىن ءوندىرىستى ازايتۋعا كەلىسسوز جۇرگىزگەن. ءبىراق ۆەناداعى جيىندا تاراپتار كەلىسە الماي، رەسەي وپەك ۇسىنىسىن قولدامادى. وسىدان سوڭ ساۋد ارابياسى "باعا سوعىسىن" باستاپ، ازيا ءۇشىن مۇناي باعاسىن باررەلىنە ءۇش-تورت دوللارعا، اقش ءۇشىن جەتى دوللارعا دەيىن ءتۇسىرىپ جىبەردى. ال بۇگىن، 9 ناۋرىزدا Brent ماركالى مۇناي باررەلىنە 36 دوللاردان ساتىلىپ، دوللار باعاسى كۇرت ءوستى. بۇگىن تاڭەرتەڭ قازاقستانداعى اقشا ايىرباستاۋ پۋنكتەرىندە دوللار 397 تەڭگەدەن ساتىلا باستاعان.  كەيىن ءتۇس اۋا نۇر-سۇلتان مەن الماتىداعى كەيبىر اقشا ايىرباستاۋ ورىندارى دوللار ساتۋدى توقتاتتى.