11 ناۋرىزدا باتىس قازاقستان وبلىسى تەرەكتى اۋدانى اقجايىق اۋىلىنىڭ تۇرعىندارى جەرگىلىكتى اۋرۋحاناداعى كورپۋستاردىڭ ءبىرىن كوروناۆيرۋسقا بايلانىستى كارانتيندىك بلوك رەتىندە پايدالانۋ تۋرالى شەشىمگە قارسى شىقتى. بيلىك وكىلدەرى مەن تۇرعىنداردىڭ كەزدەسۋى كەزىندە شامامەن 30 ادام اۋرۋحانانىڭ ناۋقاستاردى قابىلداۋعا شاماسى كەلمەيتىنىن ايتىپ، كارانتينگە ادام اكەلمەۋدى تالاپ ەتتى7 بۇل تۋراى ازاتتىق حابارلادى. 

- ۆيرۋس تابىلعان ورىنداردان ادامداردى وسىندا اكەلەتىنىن كەشە عانا بىلدىك. ۆيرۋس وشاعىندا بولعان ادامدار ءبىزدىڭ اۋرۋحاناعا جاتقىزىلادى. مەن ءوزىم ءۇشىن، بالالارىم ءۇشىن، اۋىلىم ءۇشىن قورقامىن، - دەدى اقجايىق تۇرعىندارىنىڭ ءبىرى باقىتگۇل اجماعانبەتوۆا.

ونىڭ ايتۋىنشا، تۇرعىندارعا كارانتيندىك كورپۋستىڭ نەلىكتەن اقجايىق اۋىلىندا ورنالاسۋى قاجەت ەكەنىن ەشكىم تۇسىندىرمەگەن.

- ءبىزدىڭ اۋىلدا جۇقپالى اۋرۋلار اۋرۋحاناسى بار، سول ءۇشىن وسىندا بولادى دەپ جاتىر. ءبىراق اۋرۋحانا ناۋقاستاردى قابىلداۋعا دايىن با، جوق پا، بىلمەيمىز. ءبىزدىڭ اۋرۋحانادا ەشقاشان جۇقپالى اۋرۋمەن اۋىرعاندار جاتپاعان. مەنىڭ ويىمشا، دارىگەرلەر مۇنداي ناۋقاستاردى قابىلداۋعا دايىن ەمەس، - دەيدى اجماعانبەتوۆا.

بيلىكتىڭ ايتۋىنشا، ايماقتا ەشكىمنەن كوروناۆيرۋس تابىلماعان، سوندىقتان بۇل جەرگە ساۋ ادامدار كەلەدى.

- مۇندا كارانتيندىك ستاسيونار بولماق، سوندىقتان مۇندا تەك ساۋ ادامدار عانا بولادى. بارلىق ەلدى مەكەندەردە، ءتىپتى ورالدا دا وسىنداي كارانتيندىك بلوكتار بار. ەگەر ءۇي جاعدايىندا كارانتيندە وتىرا الماسا، ولار كارانتيندىك ستاسيونارعا جىبەرىلمەك. ۆيرۋس جىلدام تاراپ جاتقانداي بولسا دەپ بەس مىڭ ادامعا شاقتاپ، ورىن دايىنداپ وتىرمىز، - دەدى باتىس قازاقستان وبلىسىنىڭ ساپانى باقىلاۋ مەن تاۋارلار قاۋىپسىزدىگى دەپارتامەنتىنىڭ باسشىسى مۇحامعالي ارىسبايەۆ.

ارىسبايەۆتىڭ ايتۋىنشا، وبلىستاعى ەلدى مەكەندەر اۋرۋدىڭ تارالۋىنا دايىن بولۋى كەرەك. ونىڭ ايتۋىنشا، اقجايىقتاعى اۋرۋحانا "توتەنشە جاعدايعا" دايىن.

- جەرگىلىكتى جۇقپالى اۋرۋ اۋرۋحاناسىنىڭ عيماراتىندا بارلىق جاعداي جاسالعان... كورپۋس بوكستارعا بولىنگەن، ءاربىر بوكسقا جەدەل جاردەم كولىگى كىرە الادى. ءاربىر بوكستىڭ پالاتالارى مەن جەكە سانيتارلىق تورابى بار، كوشەگە شىعاتىن جولى بار، ولار بىر-بىرىنەن الشاق ورنالاسقان، - دەدى تەرەكتى اۋرۋحاناسىنىڭ باس دارىگەرى بەكزات قۇبايەۆ.

كەزدەسۋ شامامەن ەكى ساعاتقا سوزىلدى. كەيبىر اۋىل تۇرعىندارى كەزدەسۋدە پىكىرلەرى ەسكەرىلمەگەنىن ايتتى.

- ەگەر بيلىك ءبىزدى ەستىمەسە، ءبىزدىڭ پىكىرلەرىمىزبەن ساناسقىسى كەلمەسە، نە ىستەۋ كەرەكتىگىن بىلمەيمىز. كوروناۆيرۋس جۇقتىرعان ادامداردى مۇندا اكەلۋگە تۇبەگەيلى قارسىمىز، - دەدى تۇرعىنداردىڭ ءبىرى دارزان قايىرعازييەۆ.

اقپان ايىنىڭ سوڭىندا شىعىس قازاقستان وبلىسىندا قىتايمەن شەكارالاس ءبىرقاتار ەلدى مەكەن تۇرعىندارى ايماقتا كارانتيندىك بلوكتاردىڭ اشىلۋىنا قارسىلىق بىلدىرگەن ەدى.

قازاقستان بيلىگى ەلدە كوروناۆيرۋس تابىلماعانىن ايتادى. ەلدىڭ باس سانيتارلىق دارىگەرى جانداربەك بەكشين اپتا باسىندا جاقىن ارادا كوروناۆيرۋس تابىلۋى مۇمكىن ەكەنىن ەسكەرتكەن.

دۇنيەجۇزىلىك دەنساۋلىق ساقتاۋ ۇيىمى 11 ناۋرىزدا جاڭا كوروناۆيرۋستى "پاندەميا" دەپ اتادى. الەمدە ۆيرۋستى جۇقتىرعاندار سانى 122 مىڭنان اسقان. 4،3 مىڭ ادام كوز جۇمعان.