قازاقستان مۇسىلماندارى ءدىني باسقارماسى كوروناۆيرۋستىڭ الدىن الۋ شارالارىنا قاتىستى ۇندەۋ جاريالادى، دەپ حابارلايدى Qamshy.kz اقپارات اگەنتتىگى.
ءماتىن قاز-قالپىندا بەرىلىپ وتىر:
بۇگىندە الەم جۇرتشىلىعىن دۇرلىكتىرگەن كوروناۆيرۋس كوپتەگەن ەلدەرگە تاراپ ۇلگەردى. ۆيرۋستى جۇقتىرعان ادام سانى ارتۋدا. بۇل دەرت ءبىزدى دە الاڭداتىپ وتىر. سول سەبەپتى، ءار ادام ءوز وتباسىنا، ۇجىمىنا، تۋعان-تۋىستارىنا جاۋاپتى تۇلعا بولعاندىقتان، ءارقاشان ساقتىق شارالارىن جاساۋى ءتيىس. پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «وزىنە دە، وزگەگە دە زيان كەلتىرۋگە بولمايدى»، – دەگەن. ال حالقىمىزدا «اۋىرىپ ەم ىزدەگەنشە، اۋىرمايتىن جول ىزدە» دەگەن ناقىل بار. وسى رەتتە قازاقستان مۇسىلماندارى ءدىني باسقارماسى بارشا مۇسىلمان قاۋىمىن كوپشىلىكپەن وتەتىن اس-ساداقا مەن جيىنداردى، ءىس-شارالاردى مۇمكىندىگىنشە كەيىنگە شەگەرۋگە شاقىرادى. ال جاماعاتپەن وقىلاتىن بەس ۋاقىت نامازعا قاتىسقان جاعدايدا قۇلشىلىقتان كەيىن قول بەرىپ امانداسۋدان، ءبىر ورىنعا جينالىپ دۇعا ەتۋدەن ساقتانۋىمىز اسا قاجەت. ويتكەنى، قۇلشىلىقتان كەيىن قول الىپ امانداسۋ ناماز شارتتارىنا جاتپايدى.
مەشىتكە كەلۋشى مۇسىلمان جاماعاتىن تومەندەگى ساقتىق شارالارعا ءمان بەرۋگە شاقىرامىز:
مەشىتكە بەتپەردە (ماسكا) كيىپ كەلۋ؛
نامازدان تىس مەشىتتە توپتاسپاۋ؛
مەشىتكە ۇيدەن دارەت الىپ كەلۋ؛
مەشىتكە كىرگەندە جانە نامازدان سوڭ قول بەرىپ امانداسپاۋ؛
نامازدان كەيىن كوپ كىدىرمەي مەشىتتەن شىعۋ؛
جاماعاتپەن وقىلاتىن نامازعا باليعاتقا تولماعان بالالاردى الىپ كەلمەۋ؛
قاريالاردىڭ، ناۋقاستار مەن ايەلدەردىڭ جاماعات نامازىنا قاتىسپاعانى ابزال.
پايعامبارىمىز (وعان اللانىڭ سالاۋاتى مەن سالەمى بولسىن) وسيەتىندە: «ءبىر جەردە جۇقپالى اۋرۋدىڭ بار ەكەنىن بىلسەڭدەر، ول جەرگە بارماڭدار، ال ەگەر سول جەردە بولساڭدار، سىرتقا شىقپاڭدار»، – دەگەن (مۋسليم). سوندىقتان بارشا جاماعاتتى ءوزى مەن وتباسىنىڭ، ەلىمىز بەن جەرىمىزدىڭ اماندىعى ءۇشىن جاراتقانعا دۇعا جاساۋعا شاقىرامىز. اللا تاعالا جەر بەتىندەگى كۇللى ادامزاتتى ءتۇرلى اپاتتان، جامان اۋرۋدان ساقتاعاي! ءامين!
بارلىق قۇقىقتار قورعالعان. inform.kz بەلسەندى سىلتەمەنى پايدالانىڭىز https://www.inform.kz/kz/kmdb-koronavirustyn-aldyn-alu-sharalaryna-katysty-undeu-zhariyalady_a3624354
پىكىر قالدىرۋ