دەنساۋلىق ساقتاۋ ءمينيسترى ەلجان ءبىرتانوۆ كوروناۆيرۋس جۇقتىرعان قازاقستاندىقتاردىڭ قانداي ەم شارالارىن الاتىنىن ايتتى.
– ءبىز باستاپقىدا-اق مۇنىڭ جاڭا كوروناۆيرۋس ەكەنىن ايتقان بولاتىنبىز. كوروناۆيرۋسقا بايلانىستى اقپاراتتاردى دۇنيەجۇزىلىك دەنساۋلىق ساقتاۋ ۇيىمىنان الامىز، سونداي-اق ينفەكسيا تىركەلگەن ەلدەردىڭ دەنساۋلىق ساقتاۋ مينيسترلىكتەرىنەن الامىز، – دەپ مالىمدەدى ءبىرتانوۆ.
ءمينيستردىڭ ايتۋىنشا، كوروناۆيرۋس جۇقتىرعان ەلدەردە ناۋقاستار كارانتينگە جاتقىزىلعان. ۆيرۋس بەلگىلەرى بولماسا اۋرۋحاناعا جاتۋدىڭ قاجەتى جوق جانە ارنايى ەم قاجەت ەمەس.
ءبىرتانوۆ ناۋقاستارعا قانداي ەم قولدانىلاتىنىن ايتتى.
– ۆيرۋستىڭ ورتا جانە اۋىر دەڭگەيلەرى بولادى. ول كوبىنە سوزىلمالى اۋرۋلارعا بايلانىستى. ءبىز قازاقستاندىقتارعا قاتتى ۋايىمداماۋعا كەڭەس بەرەمىز... ۆيرۋستىڭ اۋىر دەڭگەيى بولسا، ۆيرۋسقا قارسى پرەپاراتتار قولدانامىز، ولار بىزدە بار. ال پنيەۆمونياعا دەيىن اسقىنسا، انتيباكتەريال پرەپاراتتار قولدانامىز. جانساقتاۋ ءبولىمى دە جەتكىلىكتى، – دەدى مينيستر.
پىكىر قالدىرۋ