الەمدى دۇرلىكتىرگەن كوروناۆيرۋس ىندەتى قازاقستانعا دا جەتتى. بۇل تۋرالى رەسمي اقپارات بارلىق ب ا ق بەتىندە جارىق كوردى. وسى ورايدا ونلاي ءبىلىم بەرۋ پلاتفورماسى Daryn.online رەسپۋبليكاداعى مەكتەپ وقۋشىلارىنا ساباقتاردى تەگىن وقىتۋعا دايىن ەكەندىكتەرىن ايتىپ، ارنايى جازبا قالدىرعان.
"اپات ايتىپ كەلمەيدى. الىستان ەمەس جاقىننان جالماپ كەلە جاتقان كوروناۆيرۋستىڭ ادامزات ءۇشىن ۇلكەن اپات ەكەنىن كەشە عانا بارلىق ب ا ق بەتتەرىنەن وقىدىق. وسىعان وراي، ەلىمىزدە پرەزيدەنت تاپسىرماسىمەن قاتاڭ باقىلاۋ ازىرلەنىپ، بىرنەشە مينيسترلىك بريفينگ ۇيىمداستىرۋعان بولاتىن. سونىڭ ىشىندە ءبىلىم جانە عىلىم ءمينيسترى اسحات ايماعامبەتوۆ مەكتەپ وقۋشىلارى مەن جوو ستۋدەنتتەرىن ونلاين وقۋ تاجىريبەسىنە كوشىرۋ تۋرالى پىكىر ءبىلدىردى.
ءبىز Daryn.online ءبىلىم بەرۋ پلاتفورماسىن اقىلى جوبا رەتىندە قوستىق. ءقازىردىڭ وزىندە جوبا رەسپۋبليكا اۋماعىندا سەرىكتەستەرمەن بىرىگىپ جۇمىس ىستەپ وتىر. اتالعان جوبا اتى ايتىپ تۇرعانداي، قازاقستانداعى بارلىق مەكتەپ وقۋشىلارىنا ارنالعان ونلاين ءبىلىم بەرەتىن پلاتفورماسى. قازىرگى تاڭدا پلاتفورمادا 18916 وقۋشى تىركەلىپ، 4616 وقۋشى ءبىلىم الۋدا.
قازىرگى جاعدايدى ەسكەرە وتىرىپ، ءبىزدىڭ پلاتفورما رەسپۋبليكاداعى بارلىق مەكتەپ وقۋشىلارىنا كومەكتەسۋگە دايىن ەكەنىن حابارلاعىمىز كەلەدى. كاسىپ كوزى بولسا دا، ءدال ءقازىر اقى تابۋدان بۇرىن، ەلىمىزدىڭ ءبىلىم جانە عىلىم مينيسترلىگىنە قولداۋ كورسەتە وتىرىپ، كەلەشەك ۇرپاقتىڭ ساپالى بىلىمىنە قول ۇشىن بەرۋگە دايىنبىز!
قۇرمەتتى، اسحات قانات ۇلى!
سىزگە ءبىز رەسمي حاتتى جىبەرگەن بولاتىنبىز. كەشە عانا ۆيسە-مينيستر شولپان تاڭات قىزىنىڭ قابىلداۋىندا بولدىق. قازاقستان ازاماتى رەتىندە ءبىز جوبامىزدى 1 اي كولەمىندە ەلىمىزدەگى بارلىق وقۋشىلارىنا تەگىن بەرۋگە جانە ونلاين ءبىلىم الۋلارىنا بارلىق جاعىنان جاعداي جاساۋعا دايىن ەكەنىمىزدى ايتقىمىز كەلەدى" دەلىنگەن جازبادا.
پىكىر قالدىرۋ