دارىگەرلەر كوروناۆيرۋس ينفەكسياسىن جۇقتىرعان الماتىداعى ءتورت ناۋقاستىڭ جاعدايى تۋرالى ايتىپ بەردى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.
«قازىرگى ۋاقىتتا كوروناۆيرۋس ينفەكسياسى راستالعان دياگنوزى بار 4 ناۋقاس جاتىر. ولاردىڭ ۇشەۋىنىڭ جاعدايى قاناعاتتانارلىق. بىرەۋى ورتاشا اۋىر جاعدايدا. ولار بەكىتىلگەن حاتتاما بويىنشا ەم الۋدا. ۆيرۋسقا قارسى جانە سيمپتوماتيكالىق تەراپيا ۋاقىتىندا باستالدى. ءقازىر ولارمەن قارىم-قاتىناستا بولعان ادامدار انىقتالىپ، جۇقپالى اۋرۋلار اۋرۋحاناسىنا جاتقىزىلدى. قارىم-قاتىناستا بولعان ادامدار دارىگەرلەردىڭ باقىلاۋىندا. ولارعا ءۇش ساعاتتىق تەرمومەتريا جۇرگىزىلىپ جاتىر. كوروناۆيرۋس جۇقتىرعاندارمەن قارىم-قاتىناستا بولعان ازاماتتاردىڭ ءبارىنىڭ جاعدايى قاناعاتتانارلىق. تەمپەراتۋرالارى كوتەرىلۋى نەمەسە اۋرۋدىڭ باسقا بەلگىلەرى انىقتالعان جوق»، - دەيدى دارىگەر ايگۇل ءابدىراحمانوۆا.
ونىڭ ايتۋىنشا، اۋرۋحاناداعى بارلىق مەديسينا قىزمەتكەرى كوروناۆيرۋس ينفەكسياسىنىڭ الدىن الۋ جانە ەمدەۋ بويىنشا جۇمىس ىستەۋگە وقىتىلىپ، دايىندالعان.
ماماندار كوروناۆيرۋستىڭ تارالۋىنا جول بەرمەۋ ءۇشىن الدىن الۋ شارالارىن ساقتاۋ كەرەكتىگىن ەسكەرتەدى. تۇرعىندارعا حالىق كوپ جينالاتىن ورىندارعا بارۋدان ۋاقىتشا باس تارتقان ءجون. سونداي-اق دارىگەرلەر جۇقپالى دەرتتەن قورعانۋ ءۇشىن قولدى سابىنمەن ءجيى جۋىپ تۇرۋعا كەڭەس بەرەدى.
ەسكە سالا كەتسەك، دەنساۋلىق ساقتاۋ ءمينيسترى 14 ناۋرىزدا ەلوردادا وتكەن باسپا ءسوز ءماسليحاتىندا ەلجان ءبىرتانوۆ قازاقستاندا ەكى ادامنىڭ كوروناۆيرۋس جۇقتىرعانىن جەتكىزگەن ەدى. كوپ وتپەي ميلان قالاسىنان نۇر-سۇلتانعا كەلگەن تاعى ءبىر قازاقستاندىقتان كوروناۆيرۋس ينفەكسياسى تابىلدى. كەيىن گەرمانيادان ۇشىپ كەلگەن قازاقستاننىڭ تاعى ءبىر ازاماتىنان كوروناۆيرۋس انىقتالدى. وسىلايشا بۇل دەرتكە شالدىققاندار سانى 4 ادامعا جەتكەن ەدى. بۇگىن تاعى ەكى قازاقستاندىقتان كوروناۆيرۋس تابىلدى.
پىكىر قالدىرۋ