قازاقستان پارلامەنتى سەناتىنىڭ ءتوراعاسى داريعا نازاربايەۆا ەلدە توتەنشە جاعداي جاريالانعانىن بايلانىستى قازاقستاندىقتارعا ۇندەۋ جاسادى. 

"ەلىمىزدىڭ پرەزيدەنتى ق.توقايەۆ ەنگىزگەن توتەنشە جاعداي - ۋاقىتىلى جانە قاجەتتى شارا. ءبىزدىڭ ورتاق ماقساتىمىز - كوروناۆيرۋس ينفەكسياسىنىڭ تارالۋىمەن كۇرەسۋ، ونىڭ قازاقستان ەكونوميكاسىنا جانە ادامداردىڭ ومىرىنە تەرىس ىقپال ەتۋىنىڭ الدىن الۋ. بارلىق مەملەكەتتىك قىزمەتتەر، اكىمدىكتەر ازاماتتاردىڭ قاۋىپسىزدىگىن قامتاماسىز ەتۋگە جانە حالىقتى بارلىق قاجەتتى زاتتارمەن ۇزدىكسىز قامتاماسىز ەتۋ ماسەلەسىن شەشۋگە جۇمىلدىرىلعان. قازىرگى ۋاقىتتا مەديسينا قىزمەتكەرلەرىنە بارىنشا كومەك پەن قولداۋ كورسەتۋ قاجەت - ولار وسى اۋرۋمەن كۇرەستىڭ الدىڭعى قاتارىندا، ادامداردىڭ ءومىرى مەن دەنساۋلىعى ولاردىڭ كاسىبيلىگى مەن جاۋاپكەرشىلىگىنە بايلانىستى" دەدى نازاربايەۆا.

ونىڭ سوزىنشە، قۇقىق قورعاۋ ورگاندارىنىڭ ارەكەتتەرىنە جانە توتەنشە جاعدايلار كەزىندەگى ازاماتتاردىڭ ءتارتىبى مەن قاۋىپسىزدىگىن قامتاماسىز ەتۋ قاجەتتىلىگىنە بايلانىستى شەكتەۋلەرگە تۇسىنىستىكپەن قاراعان ءجون. ال مەملەكەتتىك ورگانداردىڭ مىندەتى – پاندەميا جانە ونىمەن كۇرەسۋ بويىنشا جۇرگىزىلىپ جاتقان شارالار تۋرالى اقپاراتتىڭ بارىنشا اشىقتىعى مەن سەنىمدىلىگىن قامتاماسىز ەتۋ.

"ۇرەيلى كوڭىل كۇي، قاۋەسەت پەن جالعان اقپارات تاراتۋعا ۇزىلدى-كەسىلدى توقتاۋ سالۋ كەرەك. دۇرلىكتىرۋشىلەر مەن ارانداتۋشىلار – كورونوۆيرۋستىڭ ءوزى سياقتى ءبىزدىڭ دۇشپانىمىز. پاندەميامەن كۇرەسۋدەگى ءبىزدىڭ ورتاق جەتىستىگىمىز، ءبىرىنشى كەزەكتە، بۇكىل قوعامنىڭ، ەلىمىزدىڭ بارلىق ازاماتتارىنىڭ، بىزدەردىڭ، قازاقستاندىقتاردىڭ جاۋاپكەرشىلىك ۇستانىمىنا بايلانىستى. تىنىشتىقتى، ءتارتىپتى، گيگيەنانى ساقتاۋ، وقشاۋلانۋ، وزىڭىزگە جانە جاقىن ادامدارىڭىزعا قامقورلىق جاساۋ - ۆيرۋسپەن كۇرەسۋدىڭ باستى قۇرالى. بۇگىن بارىمىزگە ىنتىماقتاستىق جانە ءوزارا جاۋاپكەرشىلىك پەن كومەك قاجەت. ءوزىڭىزدى جانە جاقىن ادامدارىڭىزدى كۇتىڭىزدەر. ءبارىمىز بىرگە جەڭەمىز!" دەدى سەنات سپيكەرى. 

بۇعان دەيىن قازاقستان پرەزيدەنتى قاسىم - جومارت توقايەۆ دۇنيەجۇزىلىك دەنساۋلىق ساقتاۋ ۇيىمىنىڭ جاڭا COVID-19 كوروناۆيرۋسىن "پاندەميا" دەپ جاريالاۋىنا بايلانىستى ەلدە 2020 جىلدىڭ 16 ناۋرىز ساعات 8.00-دەن باستاپ، 2020 جىلدىڭ 15 ءساۋىر ساعات 7.00-گە دەيىن توتەنشە جاعداي ەنگىزگەن.

سوڭعى اقپارات بويىنشا، قازاقستاندا 13 ادامنان كورونۆيرۋس تابىلدى. ولاردىڭ 11ء-ى الماتىدا، ەكەۋى نۇر-سۇلتاندا اۋرۋحانادا جاتىر. بۇدان بولەك، ەلدە 2000-نان استام كارانتيندە.