ەلوردادا كوروناۆيرۋس جۇقتىرعاندارمەن بايلانىستا بولعان تۇرعىنداردىڭ ءبارى تابىلدى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ ايتتى. 

– مەملەكەت باسشىسى قاسىم-جومارت توقايەۆتىڭ جارلىعىنا سايكەس، توتەنشە جاعداي ەنگىزىلگەنى بەلگىلى. كوروناۆيرۋس ىندەتىنىڭ وتە جىلدام تارالۋىنا بايلانىستى الەمنىڭ بىرنەشە ەلىندە توتەنشە جاعداي جاريالانعانىن بىلەسىزدەر. مۇنداي قىسىلتاياڭ كەزەڭدە نۇر-سۇلتان قالاسىندا نىساندار قالاي جۇمىس ىستەيتىنى تۋرالى ايتىپ بەرۋگە رۇقسات ەتىڭىزدەر. بۇگىنگى تاڭدا قالادا كوروناۆيرۋسپەن اۋىرعاندار سانى 17 ادامعا جەتتى. سول سەبەپتەن ءبىز قاۋىپسىزدىك شارالاردى كۇشەيتتىك. بۇل ازاماتتارمەن قارىم-قاتىناستا بولعانداردىڭ بارلىعى تابىلدى. ولار ارنايى ورىندارعا جاتقىزىلدى. سونىمەن قاتار زەرتحانالىق زەرتتەۋلەر جۇرگىزىلۋدە، – دەدى كولگىنوۆ.

قالا اكىمىنىڭ ايتۋىنشا، 28 قاڭتار مەن 16 ناۋرىز ارالىعىندا ستاسيوناردا 752 ادام جاتقىزىلدى. ءقازىر وندا 318 پاسيەنت كارانتيندە جاتىر.

– دياگنوستيكا جاساپ، ەمدەۋ ءۇشىن 1051 ورىنعا ارنالعان ارنايى مەديسينالىق ورىن بەلگىلەندى. قاجەت بولعان جاعدايدا قوسىمشا وسىنشا ورىن دايىندايمىز. مەديسينالىق قىزمەتكەرلەر كوروناۆيرۋس ينفەكسياسىن جۇقتىردى دەگەن كۇدىگى بار پاسيەنتتەرمەن جۇمىس ىستەۋدىڭ ناقتى ىس-ارەكەت ءتارتىبىن جاقسى بىلەدى. ولارعا قازىرگى تاڭدا ۇلكەن سالماق تۇسۋدە. سوندىقتان قالا تۇرعىندارى مەن قوناقتارىن مەديسينالىق قىزمەتكەرلەردى قولداۋعا شاقىرامىن. مەديسينالىق ۇيىمدار دارى-دارمەكپەن، باسقا دا قاجەتتى زاتتارمەن تولىقتاي قامتاماسىز ەتىلگەن، – دەپ ايتتى قالا اكىمى.