بۇل تۋرالى ءماجىلىس ءتوراعاسى نۇرلان نىعماتۋلين ءمالىم ەتتى، دەپ حابارلايدى Qamshy.kz اقپارات اگەنتتىگى.
اتالعان شەشىم ءماجىلىستىڭ جالپى وتىرىسىنان سوڭ ايتىلدى.
«ەلىمىزدە توتەنشە جاعداي جاريالانۋىنا جانە قالامىزدا كارانتين جاريالاۋعا بايلانىستى، ءماجىلىستىڭ دە جۇمىس رەجيمى وزگەرەدى. ەرتەڭنەن باستاپ ءماجىلىس جۇمىسىنىڭ باسىم بولىگى باسقا فورماتتا وتەدى. بۇل ءار ازاماتتىڭ قاۋىپسىزدىگىن ساقتاۋ ءۇشىن جاسالاتىن شارالار، ءبارىمىز تۇسىنەمىز جانە بۇل شارالارعا جوعارى جاۋاپكەرشىلىكپەن قاراۋىمىز كەرەك»، - دەدى نىعماتۋلين.
بەلگىلى بولعانداي، دەپۋتاتتار ەندى پارلامەنت عيماراتىنا ماڭىزدى جينالىس كۇندەرى عانا كەلمەك. سونداي-اق، ءماجىلىس ۋاقىتشا كەڭەستەر وتكىزۋ مەن ازاماتتاردى قابىلداۋدى دا توقتاتپاق.
«جالپى وتىرىسقا نەگىزگى بايانداماشىلار مەن دەپۋتاتتار عانا قاتىسۋ ۇسىنىلادى. قالعان ۋاقىتتا دەپۋتاتتار اقپاراتتىق تەحنولوگيالاردى پايدالانا وتىرىپ، قاشىقتان جۇمىس ىستەيدى... ءقازىر ءماجىلىس اپپاراتىنىڭ 70 پايىزى جالاقىسى ساقتالا وتىرىپ، قاشىقتان جۇمىس ىستەپ جاتىر. قالعان 30 پايىزى قىسقارتىلعان جۇمىس كۇنىنە اۋىستى، ولار پارلامەنت عيماراتىندا ساعات 16.00-گە دەيىن جۇمىس ىستەيدى»، - دەدى ءماجىلىس ءتوراعاسى.
وسىلايشا، توتەنشە وقيعا بولماعان جاعدايدا دەپۋتاتتاردىڭ قىزمەتتىك جانە جەكە ءىسساپارلارىنا دەيىن قاتاڭ تىيىم سالىنىپ وتىر.
پىكىر قالدىرۋ