كوروناۆيرۋسقا بايلانىستى جالعان اقپارات تاراتقان كۇدىكتى انىقتالدى. بۇل تۋرالى تۇركىستان وبلىسى پوليسيا دەپارتامەنتىنىڭ باسپا ءسوز قىزمەتى حابارلادى. 

"WhatsApp مەسسەندجەرى ارقىلى بەيتانىس تۇلعالار كوروناۆيرۋستى جۇقتىرعان دەگەن كەلەس اۋدانىنىڭ تۇرعىنى تۋرالى جالعان اقپارات تاراتىلىپ جاتقانى بويىنشا حابارلاما كەلىپ ءتۇستى. اتالعان جايتتى پوليسەيلەر ق ر قىلمىستىق كودەكسىنىڭ 274-بابى 2-بولىگى "كورىنەۋ جالعان اقپارات تاراتۋ" بويىنشا سدتبت-عا تىركەلدى" دەلىنگەن اقپاراتتىق حابارلامادى.

– تەكسەرۋ بارىسىندا بەلگىلى بولعانداي، جەلىدە تارالعان اۋديوحابارلاماداعى ايەل 10.03.2020 ج ماسكەۋ-شىمكەنت رەيسىمەن گەرمانيادان ۇشىپ كەلدى. اۋەجايدا ونى مەديسينا قىزمەتكەرلەرى قارسى الىپ، شىمكەنت قالاسىنداعى پاتەرىنە ءۇي جاعدايىنداعى كارانتينگە جاتقىزعان. قازىرگى ۋاقىتتا ايەل امبۋلاتوريالىق ەم قابىلداۋدا. ونىڭ دەنساۋلىعىنا ءتونىپ تۇرعان ءقاۋىپ جوق، – دەدى وبلىستىڭ پوليسيا دەپارتامەنتى.

جابىرلەنۋشى اكۋشەر-گينەكولوگ پوليسياعا جالعان اقپارات تاراتۋشىلاردى جاۋاپكەرشىلىككە تارتۋ تۋرالى ءوتىنىشىن بىلدىرگەن بولاتىن. وسىلايشا 18.03.2020 ج. جەدەل-ىزدەستىرۋ ءىس-شاراسى بارىسىندا، كەلەس اپب-نىڭ پوليسيا قىزمەتكەرلەرى جالعان اقپارات تاراتۋشىنى انىقتادى. ازاماتشا سارىاعاش اۋدانىنىڭ تۇرعىنى بولىپ شىقتى. قازىرگى تاڭدا ول ءوز ارەكەتىن تولىق مويىنداپ، قىلمىس جاساعانىنا وكىنەتىنىن ۆيدەو ارقىلى جەتكىزدى.

دەپارتامەنتتىڭ ايتۋىنشا، ءقازىر اتالعان جايت بويىنشا سوتقا دەيىنگى تەرگەۋ امالدارى جۇرگىزىلۋدە. ساراپتاما تاعايىندالدى. كۇدىكتى قولحاتتا.