الماتىدا تاعى 3 ادام كوروناۆيرۋس جۇقتىرعانى انىقتالدى. ءقازىر جۇقپالى اۋرۋلار اۋرۋحاناسىندا كۆي راستالعان 22 پاسيەنت بار. بۇل تۋرالى الماتى قالالىق قوعامدىق دەنساۋلىقتى ساقتاۋ باسقارماسىنىڭ باسشىسى تىلەۋحان ابىلدايەۆ بريفينگتە ايتتى. 

– بۇگىن جاتقىزىلعان 3 ادامنىڭ ءبىرى – ايەل ادام شەتەلدەن كەلگەن ازاماتتارمەن بايلانىستا بولعان. قۇرعاق جوتەل، تاماق قىرىلداۋى، كەۋدە اۋىرىپ، قۇلاقتىڭ بىتەلۋى سياقتى سيمپتومدار بولعان سوڭ ودان 18 ناۋرىزدا تەست الىنعان بولاتىن. بۇگىن تەست ناتيجەسى راستالدى. ەكىنشى پاسيەنت - بەرلين-الماتى چارتەرلىك رەيسىنىڭ بورتسەرىگى. 12 ناۋرىزدان ۇشىپ كەلگەن كۇننەن باستاپ جۇقپالى اۋرۋلار اۋرۋحاناسىندا كارانتيندە بولدى. ءۇشىنشى پاسيەنت - 1997 جىلى تۋعان ەر ادام 19 ناۋرىزدا پاريج-مينسك-الماتى رەيسىمەن ۇشىپ كەلگەن. ءقازىر تەست كورسەتكىشى راستالعان سوڭ ول پروۆيزورلىق كلينيكادان قالالىق جۇقپالى اۋرۋلار اۋرۋحاناسىنا اۋىستىرىلدى، – دەدى ابىلدايەۆ.

ول قازىرگى ۋاقىتتا 20 ناۋقاستىڭ جاعدايى ويداعىداي جانە ولاردىڭ بارلىعىنىڭ دەنساۋلىعى جاقسارا باستاعانىن اتاپ ءوتتى.