21 ناۋرىزدا الماتى وبلىسىندا كوروناۆيرۋس جۇقتىرعان ءبىر ادام انىقتالدى. وسىعان بايلانىستى الماتى وبلىستىق دەنساۋلىق ساقتاۋ باسقارماسى تالدىقورعاندا بريفينگ وتكىزىپ، ۆيرۋس جۇقتىرعان ازامات تۋرالى مالىمەت بەردى.

باسقارمانىڭ دەرەگىنشە،  ۆيرۋس جۇقتىرعان ازامات كەشە، 20 ناۋرىزدا اۋرۋحاناعا ءوزى تەلەفون سوعىپ، جەدەل جاردەم شاقىرعان. 

"ناۋقاس 20 ناۋرىز كۇنى  ساعات 10.45-تە قاراساي اۋداندىق اۋرۋحاناسىنا تەلەفون سوعىپ، دەنە قىزۋىنىڭ كوتەرىلگەنى جايلى حابارلاعان. سونىڭ ارقاسىندا دارىگەرلەر ونى ساعات 11.30-دا  ينفەكسيالىق اۋرۋحاناعا وقشاۋلادى. قازىرگى ۋاقىتتا ونىڭ جاعدايى ورتاشا. قۇرعاق جوتەلى، كىشكەنە دەنە قىزۋى ءالى دە بار" دەدى الماتى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.

ونىڭ ايتۋىنشا، ۆيرۋس جۇقتىرعان ادام 17 ناۋرىز كۇنى ساۋد-ارابياسىنان ستامبۋل ارقىلى بىشكەككە ۇشىپ كەلگەن.

"ونىڭ جۇرگەن جولىن تەكسەرگەندە، 17 ناۋرىز كۇنى ساۋد-ارابياسىنان ستامبۋل ارقىلى بىشكەككە ۇشىپ كەلگەنگى انىقتالدى. بىشكەك كەدەنىنەن جاياۋ ءوتىپ، تاكسيمەن الماتىعا كەلگەن. تاكسيدە وزىمەن بىرگە تاعى 3 ازامات بولعان. الماتىدا ونى دوستارى كۇتىپ الادى. ول جەردە ءبىر كۇن بولىپ، سودان كەيىن جامبىل وبلىسىنداعى شۋ قالاسىنا ءوزىنىڭ وتباسىنا بارعان. ول جاقتا ءبىر كۇن بولىپ، الماتى وبلىسى قاراساي اۋدانىنا كەلگەن. قاراساي اۋدانىندا ءوزى جالعىز تۇرادى. تەكسەرە كەلە بۇل ادامنىڭ 11 اداممەن قارىم-قاتىناستا بولعانى انىقتالدى. ولاردىڭ بارلىعى وقشاۋلانىپ، اۋرۋحانالارعا جاتقىزىلدى" دەدى باۋىرجان ىسقاق. 

رەسمي اقپارات بويىنشا، قازاقستاندا ۆيرۋس جۇقتىرعان 53 ادام بار. نۇر-سۇلتاندا – 28 ادام، الماتىدا – 22 ادام، قاراعاندىدا – 2 ادام، الماتى وبلىسىندا 1 ادام ەمدەلىپ جاتىر.

قازاقستاندا Covid-19 كوروناۆيرۋسىن جۇقىتىرعاندار العاش رەت 13 نارۋىزدا انىقتالعان. كەيىن، 15 نارۋىزدا – ۆيرۋس جۇقتىرعاندار سانى سەگىز ادامعا جەتكەندە پرەزيدەنت قاسىم-جومارت توقايەۆتىڭ جارلىعىمەن ەلدە 16 ناۋرىز تاڭعى سەگىزدەن 15 ءساۋىر تاڭعى جەتىگە دەيىن توتەنشە جاعداي جاريالانعان بولاتىن. ال 19 نارۋىزدان باستاپ ەلدىڭ ەكى ءىرى قالاسى – نۇر-سۇلتان مەن الماتى كارانتينگە جابىلدى.