بۇگىن، 21 نارۋىزدا قازاقستان پرەزيدەنتى قاسىم-جومار توقايەۆ ەلدەگى پاندەمياعا قارسى كۇرەس جۇمىستارىن ۇيلەستىرەتىن ورتالىقتىڭ جۇمىسىمەن تانىستى. بۇل اقپاراتتى اقوردا سايتى حابارلادى. 

اقوردا حابارلاماسىن قارعاندا، دەنساۋلىق ساقتاۋ ءمينيسترى ەلجان ءبىرتانوۆ پرەزيدەنتكە الەمدە جانە ەلدە كوروناۆيرۋستىڭ تارالۋىنا قارسى كۇرەستى ۇيلەستىرۋ جانە مونيتورينگ جاساۋ ادىستەرى، ونىڭ ىشىندە اۋىرعانداردى انىقتاۋ جانە ەسەپكە الۋ جونىندەگى جۇمىستاردا سيفرلىق تەحنولوگيانى قولدانۋ تۋرالى بايانداعان.

ال پرەزيدەنت حالىقتى تىنىشتىق ساقتاۋعا شاقىرىپ، ۇكىمەتكە ىندەتتىڭ تارالۋىنا بايلانىستى قاۋەسەتتەر مەن دۇربەلەڭگە توسقاۋىل قويۋ ءۇشىن ازاماتتاردى شۇعىل ءارى شىنايى اقپاراتتارمەن قامتاماسىز ەتۋ مىندەتىن قويدى. 

اقوردانىڭ جازۋىنشا، توقايەۆ كوروناۆيرۋسقا قارسى كۇرەسۋ ءۇشىن قابىلدانىپ جاتقان شارالارعا وڭ باعا بەردى، ءبىراق ءالى دە ناتيجە كەرەك ەكەنىن ايتتى.

"ۇكىمەت از جۇمىس ىستەگەن جوق. مامانداردىڭ باعالاۋىنشا، ءبىز ەۋروپا ەلدەرىنە قاراعاندا ايتارلىقتاي شۇعىل ارەكەت ەتىپ جاتىرمىز. دەگەنمەن بىزگە ناتيجە كەرەك. حالىق ءالى تولىق اقپارات الا الماي وتىر. بىزدە ءالى كۇنگە دەيىن ءتيىستى كولەمدە بەتپەردەلەردىڭ جەتىسپەيتىندىگىن اتاپ ايتقىم كەلەدى. ءبىراق قاعاز جۇزىندە ءبارى جەتكىلىكتى. ءبىر جاعىنان حالىق ءدارىحانالاردا بەتپەردەلەردىڭ ءالى دە جوق ەكەنىن ايتىپ شاعىمدانۋدا. نەگە؟ بۇل الىپساتارلىق دەپ ويلايمىن" دەدى پرەزيدەنت. 

بۇعان قوسا،توقايەۆ مەملەكەت ەلدەگى بارلىق قالالاردا ازاماتتارعا تەگىن ماسكا تاراتا الاتىنداي بولۋى كەرەك ەكەنىن ايتتى. 

پرەزيدەنت پاندەميانىڭ 160-تان استام ەلگە تارالعانىن ايتىپ، "شەكارالاس مەملەكەتتەرمەن بىرلەسە ارەكەت ەتكەن ءجون" دەدى.

ونىڭ ايتۋىنشا، ەلدە كارانتين رەجيمىن ساقتاۋدىڭ ماڭىزى زور.

"باقىلاۋ-وتكىزۋ بەكەتتەرىن قويعانىمىز ءازىل نەمەسە قويىلىم ەمەس. كارانتين رەجيمىن قاتاڭ ساقتاماي، ءبىز بۇل باعىتتا ەشقانداي تابىسقا قول جەتكىزە المايمىز. ءبىز كارانتين جاعدايىن قاتاڭ ساقتاۋعا ءتيىسپىز" دەدى پرەزيدەنت.

بۇعان قوسا، توقايەۆ وتاندىق مەديسينانى، سونىڭ ىشىندە، سانيتارلىق-ەپيدەميولوگيالىق قىزمەتتى جانە مەديسينا عىلىمىن دامىتۋعا باسا ءمان بەرۋ كەرەك ەكەنىن ايتتى.

"ءقازىر بۇكىل الەمنىڭ جانە بۇكىل الەمدىك ەكونوميكانىڭ تاعدىرى عالىمداردىڭ قولىندا. بۇل ارتىق ايتقاندىق ەمەس. الەمنىڭ تاعدىرىن فۋتبولشىلار، شوۋ-بيزنەس وكىلدەرى ەمەس، عالىمدار شەشەدى. ءبىز وسى جاعدايدان ساباق الۋعا ءتيىسپىز" دەدى ول.

رەسمي اقپارات بويىنشا، قازاقستاندا ۆيرۋس جۇقتىرعان 53 ادام انىقتالدى. نۇر-سۇلتاندا – 28 ادام، الماتىدا – 22 ادام، قاراعاندىدا – 2 ادام، الماتى وبلىسىندا 1 ادام ەمدەلىپ جاتىر.

قازاقستاندا Covid-19 كوروناۆيرۋسىن جۇقتىرعاندار العاش رەت 13 ناۋرىزدا انىقتالعان. كەيىن، 15 ناۋرىزدا – ۆيرۋس جۇقتىرعاندار سانى سەگىز ادامعا جەتكەندە پرەزيدەنت قاسىم-جومارت توقايەۆتىڭ جارلىعىمەن ەلدە 16 ناۋرىز تاڭعى سەگىزدەن 15 ءساۋىر تاڭعى جەتىگە دەيىن توتەنشە جاعداي جاريالانعان بولاتىن. ال 19 ناۋرىزدان باستاپ ەلدىڭ ەكى ءىرى قالاسى – نۇر-سۇلتان مەن الماتى كارانتينگە جابىلدى.