"نۇر وتان" پارتياسى ءتوراعاسىنىڭ ءبىرىنشى ورىنباسارى باۋىرجان بايبەك قازاقستاندىقتاردى ناۋرىز مەرەكەسىمەن قۇتتىقتادى.
"ارداقتى اعايىن! ۇلىستىڭ ۇلى كۇنى – ءاز-ناۋرىز قۇتتى بولسىن!
كوگىلدىر كوكتەممەن بىرگە بارشا دۇنيەنى جاڭعىرتىپ-جاساندىرىپ، تىرشىلىكتى تۇلەتىپ-تۇرلەندىرىپ كەلگەن ناۋرىز – بارشا بەرەكەنىڭ باستاۋى، ىرىستىڭ الدى، ىنتىماقتىڭ ۇيىتقىسى. كۇن مەن ءتۇن تەڭەلگەن، بارشا جۇرت باققا كەنەلگەن مامىراجاي شاق. سوندىقتان دا بۇل كۇندى حالقىمىز بار مەرەكەنىڭ ۇلىعى، يگىلىكتى ءىستىڭ ءىرىسى ساناپ، ۇلىستىڭ ۇلى كۇنى دەپ اسپەتتەگەن. وتكەنگە سالاۋات ايتىپ، بۇرىنعى وكپە-رەنىشتەرىن كەشىرىسكەن. كەلەر كۇنگە ءۇمىتىن جالعاپ، جوبا-جوسپارلارىن تۇزىسكەن.
بارشاعا بەلگىلى، ەلىمىز ءۇشىن بيىلعى جىل باسى وڭاي بولماي تۇر. الەم جۇرتشىلىعىن شارپىعان قاتەرلى ىندەت دۇنيەنى دۇربەلەڭگە سالۋدا. وسىعان وراي ەلباسى ءبىر اي بۇرىن قاۋىپسىزدىك كەڭەسىنىڭ وتىرىسىن وتكىزىپ، سىن-قاتەرلەردىڭ الدىن الۋعا دايىن بولۋدى قاداپ تۇرىپ تاپسىردى. مەملەكەت باسشىسى قاسىم-جومارت توقايەۆ ۋاقتىلى شەشىم قابىلداپ، ىندەتتىڭ تارالماۋى ءۇشىن ءتيىستى ساقتىق شارالارىن كۇشەيتتى. ءقازىر بار جاعداي مەملەكەت باقىلاۋىندا، ءتيىستى رەسۋرستار جەتكىلىكتى. مۇقالماس جىگەرى مەن اۋىزبىرشىلىگىنىڭ ارقاسىندا حالقىمىز تاعدىردىڭ تالاي قيىن-قىستاۋ كەزەڭدەرى مەن سىندارلى ساتتەرىنەن سۇرىنبەي وتكەنىن بىلەمىز. جۇدىرىقتاي جۇمىلىپ، بىرلىگىمىز بەن پاراساتتىلىعىمىزدى تانىتساق، بۇل وتكىنشى قيىندىقتى دا ەڭسەرەمىز.
بارشاڭىزدى وسىناۋ بەرەكە مەن بىرلىك، تەڭدىك پەن كەڭدىك، دامۋ مەن وركەندەۋ كۇنىمەن قۇتتىقتاي وتىرىپ، ءاربىر شاڭىراققا اماندىق، سارقىلماس قۇت-قازىنا، مول ىرىزدىق تىلەيمىن. قابىرعالى قالىڭ ەلىمىز، ايبىندى جۇرتىمىز امان بولسىن. جاراتقان ءاردايىم جار بولىپ، توتەننەن كەلەر كەسىردەن ساقتاسىن.
ۇلىس وڭ، اق مول بولسىن!" دەپ جازدى بايبەك Instagram پاراقشاسىندا.
پىكىر قالدىرۋ